28.03.2026 | 19:57
Սպասվում են տեղումներ. լեռնային գոտիներում՝ թաց ձյան, նախալեռնային և հովտային գոտիներում՝ անձրևի տեսքով
Հասանովը հանձնարարել է «պատրաստ լինել ցանկացած պահի օգտագործել զենք ու տեխնիկա»
Քաղաքականություն
28.03.2022 | 13:42
Ադրբեջանի պաշտպանության նախարար Զաքիր Հասանովի գլխավորությամբ այսօր Կենտրոնական հրամանատարական կետում ծառայողական խորհրդակցություն է անցկացվել։
Ադրբեջանական լրատվամիջոցների փոխանցմամբ՝ խորհրդակցության մասնակիցները վերլուծել են իրավիճակն Արցախում և հայ-ադրբեջանական սահմանին։
«Նախարարը կոնկրետ հանձնարարականներ է տվել բանակի պաշտոնատար անձանց՝ պահպանել զորամասերի մարտական պատրաստության բարձր մակարդակը, մշտապես կատարելագործել ծառայողական և մարտական գործունեությունը, բարձրացնել զգոնությունը»,- ասվում է հաղորդագրության մեջ։
Բացի այդ, Հասանովը հանձնարարել է իրական մարտական պայմաններին համապատասխան ինտենսիվ վարժանքներ և գործնական պարապմունքներ անցկացնել, պատրաստ լինել զորամասերի առջև ծառացած մարտական առաջադրանքների ճշգրիտ և ժամանակին կատարմանը։
«Նախարարը հրահանգել է հրամանատարներին ու սպայական կազմին՝ պատրաստ լինել ցանկացած պահի օգտագործելու ժամանակակից զենք, տեխնիկա և այլ զինատեսակներ, որոնք սպառազինություն են»,- ասվում է հաղորդագրության մեջ։
Հասանովը նաև հանձնարարել է համապատասխան պաշտոնյաներին հատուկ ուշադրություն դարձնել բարձր լեռնային և կլիմայական ծանր պայմաններում մարտական հերթապահություն իրականացնող ստորաբաժանումների նյութատեխնիկական և ինժեներական աջակցության վրա։
Հիշեցնենք՝ ադրբեջանական զորքերի ներխուժումը Լեռնային Ղարաբաղում Ռուսաստանի խաղաղապահ զորախմբի պատասխանատվության գոտի շարունակվում է։
Էմմա Չոբանյան
