Ըստ Աղաջանյանի` ռուս խաղաղապահներին միջազգային առաքելությամբ փոխարինելու անհրաժեշտություն չկա․ ՏԵՍԱՆՅՈՒԹ

Մարտի 24-25-ի իրադարձությունների հետևանքով Ադրբեջանի վերահսկողության տակ անցած տարածքները գտնվել են Ռուսաստանի Դաշնության պատասխանատվության գոտում: Մինչև այս պահը ռուսական կողմից որևէ պաշտոնական դիրքորոշում չկա ստեղծված իրավիճակի վերաբերյալ: Այսօր հրավիրված ասուլիսի ժամանակ այս մասին հայտարարեց Հայաստանի Ազգային ժողովի արտաքին հարաբերությունների մշտական հանձնաժողովի նախագահ Էդուարդ Աղաջանյանը:

«Այնուամենայինիվ սպառված չէ ռուս խաղաղապահների արդիականությունը իրենց պատասխանատվության գոտում գտնվող տարածքում: Եվ մենք կարծում ենք, որ վերջիններիս հետ հնարավոր է լուծումներ գտնել և հասնել այն կետին, որպեսզի եռակողմ հայտարարությունից բխող պարտավորությունները բոլոր կետերն իրականացնեն, այդ թվում՝ ռուս խաղաղապահների կողմից»,- ընդգծեց Աղաջանյանը:

«Ես ունեմ տպավորություն, որ մեր հանրության բավական լայն շերտերի մոտ կա այն մտայնությունը, այն գնահատականը, թե ադրբեջանական կողմը հետևողականորեն իրականացնում է սադրանքներ, և խաղաղապահների ներկայությունը որևէ ազդեցություն գործնականում չի ունենում: Այդ թվում՝ կան հարցադրումներ առ այն, թե արդյոք հնարավոր է, որ սա տեղի է ունենում ադրբեջանցիների և խաղաղապահների միջև որոշակի պայմանավորվածությունների արդյունքում։ Ես անձամբ չէի ուզի այդպես կարծել և որևէ հիմք կամ նույնիսկ ցանկություն չունեմ այդ ուղղությամբ մտածելու, բայց կարծում եմ, որ սա ևս մեկ խնդիր է, որը պետք է փարատվի մեր ռուս գործընկերների կողմից՝ կոնկրետ գործողությունների գործադրման արդյունքում, որի հետևանքով ադրբեջանական զինված ուժերը կվերադառնան ելման դիրքեր, լարվածությունը կնվազի։ Եվ կարծում եմ՝ դրա արդյունքում մեր հանրության ընկալումները կփոխվեն, և նշածս կասկածները կփարատվեն»,- հավելեց Աղաջանյանը։

Անդրադառնալով հարցին, թե ստեղծված պայմաններում չպե՞տք է անվտանգության այլընտրանքային տարբերակների հարցը քննարկել, Էդուարդ Աղաջանյանը նշեց, որ չի կարծում, թե այս ոլորտում ռուս գործընկերների հետ հարաբերություններն ու համագործակցությունը սպառված են։

Մանրամասները՝ տեսանյութում: