21.08.2026 | 12:03
46-ամյա Ռոնալդինյոն վերսկսում է կարիերան
ՇՀԿ-ն ուսումնասիրում է Հայաստանին և Ադրբեջանին դիտորդի կարգավիճակ տալու հարցը
Քաղաքականություն
24.03.2022 | 16:43
Շանհայի համագործակցության կազմակերպության (ՇՀԿ) անդամ երկրներն ակտիվորեն ուսումնասիրում են Հայաստանին և Ադրբեջանին դիտորդի կարգավիճակ տալու հարցը։ Այս մասին ՏԱՍՍ-ին տված հարցազրույցում ասել է կազմակերպության գլխավոր քարտուղար Չժան Մինգը։
«Ինչ վերաբերում է Ադրբեջանի և Հայաստանի կողմից դիտորդի կարգավիճակ ստանալու հարցին, ՇՀԿ անդամ երկրներն այն ակտիվորեն ուսումնասիրում են։ Այս առումով ես անձամբ լավատես եմ, թեև այս պահին չեմ կարող հստակ ժամկետ նշել»,- ասել է նա։
Չժան Մինգի խոսքով՝ երկու երկրների հարաբերությունները կարևոր գործոն են, որը պետք է հաշվի առնել։
«Միևնույն ժամանակ, ՇՀԿ անդամ երկրները միակարծիք են կազմակերպություն երկկողմ հակասություններ չմտցնելու հարցում։ Սա նույնպես պարտավորություն է, որը պետք է կատարի ցանկացած երկիր, որը հավակնում է անդամակցել ՇՀԿ-ի ընտանիքին»,- հավելել է Մինգը։
ՇՀԿ-ի ստեղծման մասին հռչակագիրը ստորագրվել է 2001 թվականի հունիսին Շանհայում՝ Ղազախստանի, Ղրղզստանի, Չինաստանի, Ռուսաստանի, Տաջիկստանի և Ուզբեկստանի կողմից: 2017 թվականին Հնդկաստանը և Պակիստանը դարձել են ՇՀԿ-ի լիիրավ անդամներ։ Հայաստանն ու Ադրբեջանը երկխոսության գործընկերների կարգավիճակ ունեն։
Տաթև Ֆռանգյան
