21.08.2026 | 22:51
Մարմնամարզիկ Արթուր Ավետիսյանը՝ Եվրոպայի չեմպիոն
Թուրքական դատարանն արդարացրել է Հայոց ցեղասպանությունը ճանաչած Դիարբեքիրի փաստաբանների միության ղեկավարներին
Քաղաքականություն
22.02.2022 | 15:20
Թուրքական դատարանն արդարացրել է Դիարբեքիրի փաստաբանների միության նախագահ Նահիթ Էրենին, նախկին նախագահ Ահմեդ Օզմենին և գործադիր խորհրդի նախկին 9 անդամներին՝ 2017 և 2018 թվականներին նրանց արած հայտարարությունների վերաբերյալ գործով, գրում է Duvar-ը։
11 հոգի մեղադրվում էր «մարդկանց ատելության ու թշնամանքի դրդելու», «թուրք ազգին վիրավորելու», «երկրի պետական կառույցներն ու մարմինները վիրավորելու» համար։ Պատճառը 2017 և 2018 թվականների ապրիլի 24-ին Հայոց ցեղասպանության հիշատակի օրը հայտարարությունների տարածումն էր։
Փաստաբանների միության անդամները նաև դատարանի առաջ էին կանգնել 2017 թվականին արված մեկ այլ հայտարարության համար, որով սատարել էին քրդամետ Ժողովուրդների դեմոկրատական կուսակցության պատգամավոր Օսման Բայդեմիրին, որը խորհրդարանից հեռացվել էր «Քուրդիստան» բառն օգտագործելու համար։
Դատախազները հետաքննություն էին սկսել նրանց նկատմամբ՝ մեղադրելով «թուրք ազգին, Թուրքիայի Հանրապետությունը, պետական ինստիտուտներն ու մարմինները վիրավորելու» համար։
Գործով վերջին դատական նիստում Դիարբեքիրի ծանր հանցագործությունների 13-րդ քրեական դատարանն արդարացրել է Փաստաբանների միության ղեկավարներին՝ հաստատելով, որ «Հայոց ցեղասպանություն» և «Քուրդիստան» արտահայտությունների օգտագործումը հանցագործություն չէ։
Էմմա Չոբանյան
