Ռուբեն Գալչյանի բաց նամակն ընդունվել է ի գիտություն․ ԱԳՆ 

Օրերս քարտեզագետ, ՀՀ ԳԱԱ պատվավոր դոկտոր Ռուբեն Գալչյանը բաց նամակ էր հղել վարչապետ Նիկոլ Փաշինյանին, Արտաքին գործերի նախարար Արարատ Միրզոյանին, ԿԳՄՍ նախարար Վահրամ Դումանյանին։

Նամակում, մասնավորապես, նշվում էր․ «Փետրվարի 4-ին հրատարակվեց լուրը, որ Ադրբեջանի մշակույթի նախարարը խոսել է մի կազմված ծրագրի մասին, որի նպատակն է Արցախի օկուպացված տարածքում իրենց կողմից աղվանա-ադրբեջանական անվանված հուշարձանների վրայից ջնջելու հայկական գրություններն ու հետքերը:

Այս հայտարարությունը շարունակությունն է այն պնդումին, որ Ադրբեջանի և շրջակա տարածքներում գտնվող բոլոր քրիստոնեական վանքերը, տաճարնեըը, եկեղեցիները, խաչքարերն ու հուշարձանները կառուցել են իրենց նախնիները՝ աղվանները: Օրերս Ադրբեջանի և Թուրքիայի բարձրաստիճան անձինք պաշտոնապես հայտարարեցին որ ադրբեջանցիներն ու թուրքերը բարեկամներ են ու եղբայրներ, և երկուսը նույն ազգն ու ժողովուրդն են, բաժանված երկու երկրի միջև: Այսպիսով ադրբեջանցիները դառնում են օղուզ թուրքերի ժառանգները և ուղղակի հերքում իրենց աղվանական ծագում ունենալը: Եթե սա է իրենց կարգախոսը, ապա քրիստոնյա աղվանները, ովքեր Ադրբեջանի պնդումով, կառուցել են տարածքում գտնվող և այսօր հայկական ճանաչված բոլոր վանքերը, եկեղեցիներն ու հուշարձանները, իրականում օրերս հայտարարծ իրենց թուրք նախնիների կառուցածները չեն կարող լինել: Այսպիսով Ադրբեջանի և Արցախի տարածքում գտվող քրիստոնեական որևէ հուշարձան, վանք ու եկեղեցի Ադրբեջանի թուրք նախնիների հետ մշակութային որևէ կապ չի կարող ունենալ:

Ադրբեջանի այս երկակի նախահայրեր ունենալը նրանք առ ասյօր գործածել են ըստ իշխող պայմանների: Եվրոպական ու քրիստոնյա ազգերի հետ բանակցելիս նրանք խոսել են իրենց աղվանական ծագում ունենալու մասին, իսկ Թուրքիայի հետ բանակցելիս նրանց նախնիները դառնում են թուրքական ցեղերը:

Մեր իշխանությունները այս հակասությունները պետք է բարձրաձայնեն բոլոր միջազգային քննարկումներում ու հարթակներում՝ այսպիսով հերքելով Ադրբեջանի կեղծ և հակասական հայտարարությունները: Եթե, ըստ նրանց պաշտոնական հայտարարությունների, ադրբեջանցիների նախահայրերը թրքական ցեղերն են եղել, ապա իրենց հայտարարած աղվանական-քրիստոնեական մշակույթը ներկա ադրբեջանցիների հետ չունի ոչ մի առնչություն և իրենցը չի կարող լինել»։

Factor.am-ը նամակի վերաբերյալ պարզաբանում էր խնդրել Արտաքին գործերի նախարարից։ Գերատեսչության լրատվության և հանրային դիվանագիտության վարչության պետ Սերոբ Բեջանյանը մեզ պատասխանել է, որ նախարարությունը Ռուբեն Գալչյանի հետ բազմամյա համագործակցության դրական փորձ ունի և ծանոթ է նամակի բովանդակությանը։

Իսկ ինչ դիրքորոշում ունի գերատեսչությունը Գալչյանի այն առաջարկի վերաբերյալ, թե «իշխանություններն այս հակասությունները պետք է բարձրաձայնեն բոլոր միջազգային քննարկումներում ու հարթակներում` այսպիսով հերքելով Ադրբեջանի կեղծ և հակասական հայտարարությունները»։ Առաջարկի շուրջ մեր հարցմանն ի պատասխան ԱԳՆ-ից հայտնել են հետևյալը․ «Հարկ ենք համարում ընդգծել, որ ադրբեջանական կողմի հակահայկական հայտարարություններին հետևելը, դրանց պատշաճ ձևով արձագանքելը և նման հայտարարությունների բովանդակության և ձևի վրա միջազգային հանրության ուշադրությունը հրավիրելն ԱԳՆ ամենօրյա աշխատանքի մաս են կազմում և Գալչյանի բաց նամակն ընդունվել է ի գիտություն»։

Հիշեցնենք՝ օրեր առաջ ՄԱԿ-ի հայաստանյան գրասենյակի դիմաց քաղհասարակության մի խումբ ներկայացուցիչներ և քաղաքացիներ բողոքի ակցիա էին իրականացնում՝ պահանջելով կանխել  Արցախում հայկական մշակութային ժառանգության վերացումն ու նենգափոխումը։

Արփի Հակոբյան