Քաղաքականություն
12.02.2022 | 17:02«Մեր թանգարանը տարին շատ լավ սկսեց` մեծ թվով այցելուներ ունեցանք, իսկ հետո մտցվեցին QR կոդերի հետ կապված սահմանափակումները, և դա մեզ շատ խանգարեցին, կարծում եմ` որոշումն արդարացված չէ: Արդյունքում զբոսաշրջիկների այցելությունները չկրճատվեցին, փոխարենը սահմանափակումները վատ անդրադարձան մեր հայրենակիցների այցելությունների վրա»,- Factor TV-ի հետ զրույցում նման տեսակետ է հայտնում Մարտիրոս Սարյանի տուն-թանգարանի տնօրեն, նկարչի թոռնուհի Ռուզան Սարյանը` անդրադառնալով հունվարից մշակութային օջախներ մուտք գործելու հետ կապված սահմանափակումներին: Նրա խոսքով` մի կողմից թանգարանները պետությունից ստանում են դոտացիա, ըստ որի՝ պետք է կարողանալ ապահովել տարեկան 30 հազար այցելություն, մյուս կողմից նույն այդ կառույցները հայտնվում են առաջնային թիրախում:
Ռուզան Սարյանն անդրադառնում է նաև մեր մշակութային խնդիրներին, այդ ոլորտում գիտական բանավեճերի պակասին. «Ադրբեջանն այսօր բացահայտ կերպով ուզում է ջնջել մեր մշակութային ներկայությունը գրավյալ տարածքներից, իսկ մենք ուշանում ենք աղմուկ բարձրացնելու, գիտական բանավեճեր ծավալելու հարցում: Այն սկզբունքայնությունը, որ դրսևորում է Ադրբեջանը, մենք չունենք: Վերջերս, օրինակ, քննարկվում էր Հայաստանում գորգերի թանգարան բացելու հարցը, որը հետին պլան մղվեց: Ադրբեջանում այսօր կա գորգերի երեք պետական թանգարան, մենք չունենա՞նք մեկ լծակ` որպես հակակշիռ: Գորգերի թանգարանի ստեղծման հարցը նույնիսկ չպետք է քննարկվեր, դա պետք է ստեղծվեր օր առաջ»:
Սարյանի թոռնուհին խոսում է նաև այսօրվա մտավորականների ոչ միասնական լինելու մասին. «1920-ականներին, երբ մեր երկիրը դժվարին օրեր էր ապրում, մտավորականները, թողնելով իրենց բարեկեցիկ կյանքն արտերկրում, եկան միավորվելու գաղափարի շուրջ, ապրելու այնպիսի մի Երևանում, որն անգամ դժվար էր քաղաք կոչել: 18 տարվա ընթացքում մենք կարողացանք վերածնվել: Իսկ այսօր մենք զբաղված ենք իրար միս ուտելով. շատ մանրացանք: Այսօր չունենք այնպիսի խոշոր գործիչներ, որոնք իրենց հետևից մի ամբողջ ոլորտ կարող են տանել»:
Մանրամասները` տեսանյութում:
Աննա Բաբաջանյան
