10.10.2026 | 10:44
«Կտրվի Ամուլսարի հանքավայրի շահագործման մեկնարկը»․ Փաշինյան
Բաքուն դարձյալ նյարդային է արձագանքել ՀՀ ԱԳՆ-ի՝ տարածաշրջան ՅՈՒՆԵՍԿՕ-ի առաքելության այցի շուրջ հայտարարությանը
Քաղաքականություն
11.02.2022 | 13:39
Պաշտոնական Բաքուն բավական նյարդային կերպով արձագանքել է ՀՀ ԱԳՆ մամուլի քարտուղարի մեկնաբանությանը՝ Ադրբեջանի մշակույթի նախարարության հայտարարության վերաբերյալ։ ՀՀ ԱԳՆ խոսնակ Վահան Հունանյանը նշել էր, որ 44-օրյա պատերազմի ավարտից հետո ՅՈՒՆԵՍԿՕ-ի գլխավոր քարտուղար Օդրի Ազուլեի կողմից առաջարկված` Լեռնային Ղարաբաղի հակամարտության գոտի փաստահավաք առաքելության իրականացումը հայկական կողմը համարում է առաջնահերթ և հրատապ։
Ադրբեջանի ԱԳՆ-ն, ի պատասխան, հայտարարել է, որ փետրվարի 4-ին ՀՀ վարչապետի, Ադրբեջանի ու Ֆրանսիայի, ինչպես նաև Եվրոպական խորհրդի նախագահների տեսակապով հանդիպման ժամանակ պայմանավորվածություն է ձեռք բերվել Ադրբեջան ու Հայաստան ՅՈՒՆԵՍԿՕ-ի առաքելության այցի մասին։ Ադրբեջանի ԱԳՆ-ն մեղադրում է Հայաստանի ԱԳՆ-ին Հայաստան ու Ադրբեջան ՅՈՒՆԵՍԿՕ-ի առաքելության այցի հետ կապված ձեռք բերված պայմանավորվածությունները խեղաթյուրելու մեջ։
«Մենք դատապարտում ենք Հայաստանի ԱԳՆ-ի հերթական փորձը՝ խուսափելու իր պարտավորություններից։ Ինչ վերաբերում է ՅՈՒՆԵՍԿՕ-ի տեխնիկական առաքելությանը, որը նախատեսվում է իրականացնել Ադրբեջանում, ապա ադրբեջանական կողմը առաջին օրից ողջունել է դա և ամենակարճ ժամկետում դրա իրականացման նախապատրաստական բոլոր աշխատանքները համաձայնեցվել են Ադրբեջանի և ՅՈՒՆԵՍԿՕ-ի միջև երկկողմ ձևաչափով։
Նշենք, որ Արցախյան 44-օրյա պատերազմի ավարտի առաջին օրվանից Ադրբեջանը ոչ միայն չի ողջունել, այլև ամեն կերպ խոչընդոտել է ՅՈՒՆԵՍԿՕ-ի առաքելության՝ Արցախ այցին, որը հաստատել է նաև հենց կառույցը։
Մասնավորապես, 2020թ-ի դեկտեմբերին ՅՈՒՆԵՍԿՕ-ի մշակույթի հարցերով գլխավոր տնօրենի տեղակալ Էռնեստո Օտտոնեն հայտարարել էր, որ Ադրբեջանից դեռ պատասխան չեն ստացել Արցախ կազմակերպության փորձագիտական առաքելություն ուղարկելու համար։
«Առայժմ միայն Ադրբեջանի պատասխանին ենք սպասում, որպեսզի ՅՈՒՆԵՍԿՕ-ն կարողանա առաջ շարժվել առաքելություն ուղարկելու ուղղությամբ»,- ասել էր նա։ Այն որ Բաքուն խանգարում է առաքելության այցին ու իր պայմանները առաջ քաշում, փաստել է նաև Ադրբեջանի մշակույթի նախարար Անար Քերիմովը։
Դեռ ամիսներ առաջ լրագրողների հետ զրույցում նա հայտնել էր, որ ՅՈՒՆԵՍԿՕ-ի առաքելության այցի շուրջ բանակցությունները շարունակվում են՝ նշելով, որ ադրբեջանական կողմն իր պայմանները փոխանցել է ՅՈՒՆԵՍԿՕ-ին։
Էմմա Չոբանյան
