29.03.2025 | 21:28
Լռության օրվա սահմանափակումները խախտվել են․ «Անկախ դիտորդը» ԿԸՀ դիմում է ներկայացնելու
Զինծառայության ժամկետի կրճատում, զենքի ձեռքբերումներ․ բառերի արտաքին փայլն ու խորքի խնդիրները․ ՏԵՍԱՆՅՈւԹ
Քաղաքականություն
28.01.2022 | 21:30
2020 թվականին պատերազմում պարտությունից հետո իշխանությունները սկսել էին խոսել բանակի վերափոխման և արդիականացման մասին։ Իրար հաջորդելով ՊՆ ղեկավարի պաշտոնին նշանակված Վաղարշակ Հարությունյանը, Արշակ Կարապետյանը, հիմա էլ՝ Սուրեն Պապիկյանը, սակայն, հրաժարվում են մանրամասներ հայտնել այդ ծրագրերի մասին։ Նույնն անում է նաև վարչապետ Նիկոլ Փաշինյանը։
«Ես մեր և անձամբ իմ՝ նախկինում թույլ տրված սխալը չեմ կրկնի։ Ես հրաժարվում եմ հրապարակային քննարկել զինված ուժերի հետ կապված որևէ հարց»,- դեկտեմբերյան ասուլիսին նշեց Փաշինյանը։
Զինված ուժերի կազմավորման օրվա իր ուղերձում, սակայն, Փաշինյանը հիշատակեց բանակի սկզբունքային վերափոխում նշանակող հետևյալ միտքը՝ Հայաստանի Հանրապետությունն ունենալու է պրոֆեսիոնալ բանակ: Ընդ որում՝ սա միայն ուղերձի միտք չէ, այն ներառված է Կառավարության 5-ամյա գործունեության միջոցառումների ծրագրում։
«Կավելանա պայմանագրային արհեստավարժ զինվորական ծառայության մեջ գտնվող անձնակազմի քանակը, կկրճատվի պարտադիր ժամկետային զինվորական ծառայության տևողությունը»,- նշվում է այդ ծրագրում։
Այս ամենը հեռավոր մի բան չէ․ Կառավարությունը նախատեսում է դրա վերաբերյալ օրենսդրական փաթեթը ներկայացնել արդեն այս հունիսին։ Դրա նպատակը, ըստ Կառավարության փաստաթղթի, արհեստավարժ՝ պրոֆեսիոնալ զինվորական ծառայության համակարգի ընդլայնումն է։
Պահեստազորի սպա, «Հայրենիքի Վահան» պահեստազորի սպաների միության անդամ Սամվել Պարզյանը բացատրում է պրոֆեսիոնալ բանակի խնդիրները։
«Եթե պրոֆեսիոնալ բանակ է լինելու, ապա մնացած քաղաքացիների ռազմական պատրաստությունը, պահեստազորի պատրաստությունը ո՞նց է կազմակերպվելու, ի՞նչ հիմքով է կազմակերպվելու։ Այդ պատճառով էլ ինձ համար միանշանակ չէ այդ ասածները։ Եվ ես չեմ կարողանում պատկերացնել, թե ինչ նկատի ունեն։ Եթե նկատի ունեն այն իրավիճակը, որ հիմա է՝ պայմանագրային զինծառայություն, ապա դա ոչ մի դրական արդյունք չի տալու։ Ըստ իս՝ ավելի բացասական է լինելու»,- նշում է Պարզյանը։
Հիմա Կառավարության ընթացիկ ծրագիրը նախատեսում է նաև զինված ուժերի ընդհանուր կառուցվածքային փոփոխություններ, որոնց հիման վրա էլ նախատեսվում է իրականացնել զինված ուժերի ստորաբաժանումների համալրում սպառազինությամբ և ռազմական տեխնիկայով։ը
Զինված ուժերին զենքի մատակարարումները նույնպես հիմա մնում են գաղտնիության քողի հետևում։ Օգոստոսին պաշտպանության նախարար Արշակ Կարապետյանը Մոսկվա այցից հետո խոսել էր Ռուսաստանից զենք գնելու մասին։
«Ունենք լիովին աջակցություն։ Կարող եմ ասել, որ «չէ» բառը չեմ լսել այստեղ, և գործնական քայլեր ենք անելու մեր համագործակցությունը Ռուսաստանի հետ զարգացնելու ուղղությամբ։ Մենք պլանավորում ենք ունենալ որակով սպառազինություն, նոր սպառազինություն։ Մենք հրաժարվել ենք հին սպառազինություն ձեռք բերելուց»,- նշել էր Կարապետյանը։
Ռուսաստանի կողմից Հայաստանին սպառազինություն մատակարարելու մասին առայժմ մեկ դեպք է հանրայնացվել․ ՀՀ զինված ուժերի ավիացիան համալրվել է ժամանակակից, բազմաֆունկցիոնալ նոր ուղղաթիռներով, որոնք նախատեսված են դեսանտային, կրակային, տրանսպորտային և սանիտարական խնդիրներ կատարելու համար։
Մանրամասները՝ տեսանյութում։
Գարիկ Հարությունյան
