29.06.2026 | 14:25
ՀՀ ֆինանսների նախարարն ու ԿԲ նախագահը միջազգային ներդրողներին ներկայացրել են Հայաստանի մակրոտնտեսական զարգացումները
Ովքեր էին ներկա Եռաբլուրում. բանակի 30-ամյակ` բացակա պաշտոնյաներով և առանց շքերթի. ՏԵՍԱՆՅՈՒԹ
Քաղաքականություն
28.01.2022 | 18:47
ՀՀ ԶՈՒ կազմավորման 30-ամյակը՝ առանց հանդիսավոր միջոցառումների և բարձրաստիճան մի շարք պաշտոնյաների։ Հայոց բանակի օրվան նվիրված հանդիսավոր ընդունելությունը, որ պետք է տեղի ունենար «Դվին» հյուրանոցում, հետաձգվել է․ պատճառը պաշտոնյաների մոտ հաստատված կորոնավիրուսն է: Երկու օր առաջ հայտնի դարձավ նախ՝ վարչապետի, հաջորդ օրը՝ ԳՇ պետի, բանակի ղեկավար կազմում մի շարք այլ բարձրաստիճան պաշտոնյաների վարակված լինելու մասին:
Նիկոլ Փաշինյանից բացի՝ այսօր «Եռաբլուր» զինվորական պանթեոն չէր այցելել նաև հրաժարականի դիմում ներկայացրած նախագահ Արմեն Սարգսյանը: Նա արտերկրում բուժում է ստանում:
Սովորաբար միաժամանակ «Եռաբլուր» այցելող իշխանավորներն այս անգամ թիմերի էին բաժանվել. պատգամավորներն առանձին ԱԺ նախագահ Ալեն Սիմոնյանի գլխավորությամբ էին եկել, իսկ կառավարության կազմը՝ փոխվարչապետ Մհեր Գրիգորյանի: Նա փոխարինում է ինքնամեկուսացման մեջ գտնվող Փաշինյանին:
Հարգանքի տուրք մատուցող պաշտոնյաները տրամադրված չէին խոսել բանակում առկա խնդիրների և դրանց լուծումների մասին: Մի քանի ամիս առաջ պաշտպանության նախարարի պաշտոնում նշանակված Սուրեն Պապիկյանը բանակում իրականացվող բարեփոխումների մասին հարցերն անպատասխան թողեց:
Բանակում բարեփոխումների մասին 44-օրյա պատերազմից կարճ ժամանակ անց հայտարարեց Նիկոլ Փաշինյանը: Վարչապետի որոշմամբ՝ պաշտպանության նախարարի գլխավորությամբ ԶՈւ-ում բարեփոխումներ իրականացնող աշխատանքային խումբ ձևավորվեց: Իսկ ահա այսօր բանակի 30-ամյակի առթիվ Փաշինյանն ուղերձում ընդգծել է՝ բանակի մարտունակությունը, սպառազինությունը, ծառայության պայմանները բարելավելն իրենց առաջնահերթությունն է։ Երկրի ղեկավարը վստահեցրել է՝ Հայաստանն ունենալու է պրոֆեսիոնալ բանակ, և կառավարությունն այդ աշխատանքը կատարելու է առանց հոգնելու: Թե այս բարեփոխումներն ինչ փուլում են և երբ կունենանաք պրոֆեսիոնալ բանակ, իշխանական վերնախավում լռում են:
Պայմանագրային զինծառայողներին հետաքրքրում են նաև աշխատավարձի, սոցիալական պայմանների բարելավումը։ Նախարար Սուրեն Պապիկյանն այս հարցին ևս չցանկացավ անդրադառնալ։
«Եռաբլուր» զինվորական պանթեոնում արտաքին գործերի նախարարից հետաքրքրվեցինք նաև հայ-թուրքական հարաբերությունների կարգավորման գործընթացից: Երևանի նպատակը տարածաշրջանում հարատև խաղաղություն հաստատելն է՝ հայտարարեց արտաքին քաղաքական գերատեսչության ղեկավար Արարատ Միզոյանը:
Անդրադառնալով դեմարկացիայի և դելիմիտացիայի հարցով առաջարկներին, որոնք փոխանցվել են Ադրբեջանին, նախարարը նշեց, որ հայկական կողմի համար առայժմ պարզ չէ, թե ինչ մոտեցումներ ունի այս հարցում Բաքուն։
Հիշեցնենք՝ հայկական կողմը սահմանազատման հարցով առաջարկներ է փոխանցել Բաքվին՝ Մոսկվայի միջոցով: Փաստաթղթի և առաջարկների մանրամասները կողմերից որևէ մեկը մինչ օրս չի գաղտնազերծել: Factor TV-ն ավելի վաղ, հղում անելով սեփական աղբյուրներին, հայտնել էր՝ խոսքը շուրջ տասը կետից բաղկացած առաջարկների փաթեթի մասին է: Այն ներառում է, մասնավորապես, զորքերի հայելային հետքաշում մինչ 2021 թվականի մայիսի 12-ի դրությամբ տեղակայման կետեր, հայ-ադրբեջանական սահմանից հետ քաշված ստորաբաժանումների սպառազինության թեթևացում և դեմարկացիայի ու դելիմիտացիայի գործընթացն իրականացնող հանձնաժողովի ստեղծում:
Մանրամասները՝ տեսանյութում։
Նարեկ Կիրակոսյան
