02.05.2024 | 15:29
Կկանոնակարգվեն կինոյի ոլորտի զարգացման ուղղված գործընթացները
Թուրքիան, Ադրբեջանը և Հայկ Մամիջանյանը դեմ են քվեարկել ԵԽԽՎ-ի՝ Հայաստանին վերաբերող նախագծին․ ՏԵՍԱՆՅՈՒԹ
Քաղաքականություն
28.01.2022 | 14:30
«Հայաստանում ժողովրդավարական ինստիտուտների գործունեությունը»․ Եվրոպայի խորհրդի Խորհրդարանական վեհաժողովը երեկ երեկոյան այսպիսի խորագրով բանաձև ընդունեց։ Ձայների գերակշիռ մեծամասնությամբ ընդունված բանաձևում արձանագրվում է, որ Հայաստանը նշանակալի առաջընթաց է ունեցել ժողովրդավարության զարգացման գործում 2018 թվականից սկսած։
ԵԽԽՎ բանաձևը փաստում է՝ Հայաստանը հաջողությամբ դուրս եկավ քաղաքական լուրջ ճգնաժամից, որը սկիզբ էր առել Լեռնային Ղարաբաղի հակամարտության հետևանքով։ Բանաձևի համահեղինակ, Շվեդիան ներկայացնող պատգամավոր Բորիանա Աբերգի կարծիքով՝ ճգնաժամը հանգուցալուծվեց 2021թ. հունիսին կայացած արտահերթ խորհրդարանական ընտրությունների միջոցով, որոնք կազմակերպվել էին ժողովրդավարական եղանակով՝ չնայած լրջորեն բևեռացված միջավայրին։
Վեհաժողովին ելույթ են ունեցել նաև ՀՀ Ազգային ժողովի նախագահ Ալեն Սիմոնյանը և ԱԺ փոխնախագահ Ռուբեն Ռուբինյանը։ Սիմոնյանն իր ելույթում անդրադարձել է Լեռնային Ղարաբաղի դեմ սանձազերծված 44-օրյա պատերազմի ծանրագույն հետևանքներին: Նրա խոսքով՝ ամենամեծ մարտահրավերը մնում է երկրի անվտանգությունը:
Ռուբինյանը ևս անդրադարձել է հեղափոխությանն ու 44-օրյա պատերազմին։ Ըստ նրա՝ Հայաստանը կարողացել է այդ դժվարին իրավիճակում անցկացնել արտահերթ խորհրդարանական ընտրություններ և արժանանալ միջազգային հանրության բարձր գնահատականին։
Նշենք, որ ԵԽԽՎ-ում մերժվել են ադրբեջանական պատվիրակության առաջարկած փոփոխությունները, փոխարենը վերահաստատվել է հայ ռազմագերիների վերադարձի հրամայականը։
ԵԽԽՎ պաշտոնական կայքից տեղեկանում ենք, որ «Հայաստանում ժողովրդավարական ինստիտուտների գործունեությունը» բանաձևին կողմ է քվեարկել 50 պատգամավոր, դեմ՝ 14-ը, ևս 16-ը՝ ձեռնպահ։ Ուշագրավ է, որ հայամետ բանաձևին դեմ քվեարկողների թվում է եղել նաև ՀՀ ԱԺ պատգամավոր, «Պատիվ ունեմ» խմբակցության քարտուղար Հայկ Մամիջանյանը։ Մամիջանյանից զատ՝ բանաձևին դեմ են քվեարկել Թուրքիայի և Ադրբեջանի պատվիրակությունները, ինչպես նաև մեկ պատգամավոր Նիդերլանդներից։ Հայամետ բանաձևին ձեռնպահ է քվեարկել ռուսական պատվիրակությունը՝ 14 պատգամավորով, ևս մեկական պատգամավոր էլ՝ Շվեյցարիայից ու Ավստրիայից։
Մանրամասները՝ տեսանյութում։
Ռոզա Վարդանյան
