17.12.2025 | 23:17
ԵՄ-ն կոչ է անում Թբիլիսիին ազատ արձակել անօրինական ձերբակալվածներին
Ղազինյանը կողմ է քվեարկել «իր դեմ ուղղված» օրինագծին. հանձնաժողովի փոխնախագահի ընտրության թնջուկը կլուծվի
Քաղաքականություն
20.01.2022 | 20:30
Ազգային ժողովն այսօր առաջին ընթերցմամբ ընդունեց «Քաղաքացիական պայմանագիր» խմբակցության պատգամավոր Վիլեն Գաբրիելյանի ներկայացրած օրենքի նախագիծը, համաձայն որի՝ կարող է կարգավորվել ԱԺ հանձնաժողովի նախագահի տեղակալի ընտրության հարցը: «Ազգային ժողովի կանոնակարգ» սահմանադրական օրենքում լրացումներ կատարելու մասին օրենքի նախագծին կողմ քվեարկեց 68, դեմ՝ 33 պատգամավոր։
Նախագծի հեղինակ Վիլեն Գաբրիելյանը հիշեցրեց՝ 8-րդ գումարման ԱԺ-ի պաշտպանության և անվտանգության հարցերի մշտական հանձնաժողովը չի կարողանում նախագահի տեղակալ ընտրել: «Հայաստան» խմբակցությունը 15 անգամ առաջադրել է պատգամավոր Արթուր Ղազինյանի թեկնածությունը, սակայն իշխանական պատգամավորները բոլոր դեպքերում դեմ են քվեարկել՝ առաջարկելով այլ թեկնածու առաջադրել։
Վիլեն Գաբրիելյանը նախագծով ցանկանում է լուծում տալ ստեղծված խնդրին։ Պատգամավորն առաջարկում է սահմանել, որ եթե մշտական հանձնաժողովի նախագահի տեղակալը չի ընտրվում, ապա իրավասու խմբակցությունը քվեարկությունից հետո 5 աշխատանքային օրվա ընթացքում առաջադրում է նոր թեկնածու: Ընդ որում, սա ասվածը չի նշանակում, որ նույն մարդը մի քանի անգամ չի կարող առաջադրվել. եթե, օրինակ, մեկ անգամ առաջադրվի ու չընտրվի, և հաջորդ անգամ առաջադրված այլ թեկնածուն ևս չընտրվի, ապա դրանից առաջ առաջադրված անձը կրկին կարող է առաջադրվել:
«Հայաստան» խմբակցության քարտուղար Արծվիկ Մինասյանն այսօր ասաց՝ նկատի ունենալով, որ նախագիծը վերաբերում է ԱԺ աշխատանքներին, ավելի հիմնարար քննարկումների կարիք կա: Նա առաջարկեց դեմ քվեարկել, ապա միասին քննարկել ու հիմնարար լուծումների գալ: Իսկ «Քաղաքացիական պայմանագիր» խմբակցության քարտուղար Արթուր Հովհաննիսյանը հորդորեց նորից նայել իրենց խմբակցության հայտարարությունն առ այն, որ իրենք թեկնածու չեն առաջադրելու պաշտպանության հանձնաժողովի նախագահի տեղակալի պաշտոնում:
Ուշագրավ է, որ ներկայացված օրինագծին կողմ է քվեարկել հենց ինքը՝ Ղազինյանը։ Factor TV-ի հետ զրույցում նա հաստատեց այս տեղեկությունը՝ շեշտելով՝ սարկազմից ելնելով է դա արել։
Հիշեցնենք՝ Արթուր Ղազինյանի՝ 15 անգամ անընդմեջ չընտրվելուց հետո ընդդիմադիրները հայտարարել էին, որ այլևս թեկնածու չեն առաջադրելու, և այդ օրվանից նրանք չեն մասնակցում հանձնաժողովի՝ վերոնշյալ հարցով քննարկումներին։
Մերի Մարտիրոսյան
