29.04.2024 | 16:22
Ղազախստանը ՀՀ-ի և Ադրբեջանի ԱԳ նախարարների հանդիպմանը որպես միջնորդ հանդես չի գա
Թուրքիայի քրդական կուսակցությունը պահանջում է Դինքի սպանության գործով խորհրդարանական հետաքննություն սկսել
Քաղաքականություն
19.01.2022 | 15:03
Թուրքիայի քրդական Ժողովուրդների դեմոկրատական կուսակցությունը (HDP) պահանջել է Հրանտ Դինքի սպանության խորհրդարանական հետաքննություն սկսել։ Հիշեցնենք՝ «Ակոս»-ի խմբագրապետ Հրանտ Դինքը սպանվել է 15 տարի առաջ այս օրը՝ հունվարի 19-ին։
«Անընդունելի է, որ սպանության հանգամանքները դեռ մութ են մնում»,- ասել են կուսակցության խորհրդարանական խմբակցության փոխնախագահներ Սարուհան Օլուչն ու Մերալ Դանըշ-Բեշթաշը, փոխանցում է Bianet-ը։
«Հրանտ Դինքը, որը պայքարում էր Թուրքիայի ժողովուրդների խաղաղ գոյակցության համար, սպանվել է 2007 թվականի հունվարի 19-ին։ Նրա սպանությունից 15 տարի է անցել, սակայն հանցագործության պատվիրատուները պատասխանատվության չեն ենթարկվել։
2004 թվականի փետրվարի 6-ին «Ակոս»-ում արված Թուրքիայի առաջին կին օդաչու Սաբիհա Գյոքրենի մասին արված հրապարակումից հետո, որ նա հայ որբ է եղել, Գլխավոր դատախազությունը հայտարարություն արեց՝ թիրախավորելով Դինքին։ Հետո նա կանչվել է Ստամբուլի նահանգապետարան, և ազգային հետախուզական գործակալության պաշտոնյաները նրան սպառնացել են։ Հայտարարությունից հետո Հրանտ Դինքին կազմակերպված կերպով թիրախ դարձրին պետության մութ ուժերը։ Դինքի դեմ գործ է հարուցվել 2005 թվականի ապրիլի 16-ին՝ «թուրքականությունը վիրավորելու» համար»,- ասվում է հայտարարության մեջ։
Նշվում է, որ Հրանտ Դինքի սպանության հանգամանքները չբացահայտելն անընդունելի է։
«Խորհրդարանը պետք է պատասխանատվություն վերցնի՝ բացահայտելու Դինքին սպանողին, պետության ներսում մութ շրջանակները մաքրելու և երեխայից մարդասպան ստեղծող խավարին դիմակայելու համար։ Մենք պահանջում ենք Հրանտ Դինքի սպանության խորհրդարանական հետաքննություն սկսել»,- ասվում է հայտարարության մեջ։
Էմմա Չոբանյան
