Դեռ որոշում չունենք․ Կիրանցի վարչական ղեկավարը՝ Նիկոլ Փաշինյանի հետ այսօր Երևանում հանդիպելու առաջարկի մասին

Նիկոլ Փաշինյանն այսօր հանդիպելու է կիրանցիների հետ Երևանում, այս մասին գրում է NEWS.am-ը՝ հղում անելով Կիրանցի բնակիչներին։

Կիրանցի վարչական ղեկավարը Factor.am-ի հետ զրույցում չհերքեց, որ Երևանում վարչապետի հետ հանդիպման առաջարկ ստացել են։ Կամո Շահինյանի խոսքով, սակայն, դեռ չեն որոշել կգան Երևան Նիկոլ Փաշինյանի հետ հանդիպելու, թե՝ ոչ։

Վարչապետի աշխատակազմի տեղեկատվության և հասարակայնության հետ կապերի վարչությունից էլ Factor.am-ին փոխանցեցին, որ կիրանցիների հետ հնարավոր հանդիպման մասին տեղեկություն չունեն։

Հիշեցնենք` Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվել են սահմանազատումը սկսել Տավուշի մարզից։ Սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը պետք է ավարտվի մինչև 2024 թ. մայիսի 15-ը:

ՀՀ վարչապետի աշխատակազմը հայտարարել է, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` անվտանգային ռիսկերի նվազեցում։

Կիրանց, Ոսկեպար և հարակից գյուղերի բնակիչներն ապրիլի 19-ից բողոքի ակցիա են անում՝ փակ պահելով Հայաստան-Վրաստան միջպետական ճանապարհը և դեմ արտահայտելով սահմանազատման վերաբերյալ իշխանությունների որդեգրած քաղաքականությանը։

Նշենք նաև, որ Հայաստանի Հանրապետության և Ադրբեջանի Հանրապետության սահմանին գեոդեզիական չափումների հիման վրա, կոորդինատների ճշգրտման աշխատանքների շրջանակներում ապրիլի 26-ի դրությամբ տեղադրվել էր թվով 28 սահմանային սյուն, ինչը կազմում է նախատեսված աշխատանքների մոտ 35 տոկոսը։

Մանյա Պողոսյան