30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Եվրոպական խոշորագույն բանկերը 2023 թվականին ՌԴ-ում չորս անգամ ավելի շատ հարկ են վճարել, քան պատերազմից առաջ
Քաղաքականություն
29.04.2024 | 15:08
ՌԴ-ում ակտիվների չափերով 7 խոշորագույն եվրոպական բանկերը՝ Raiffeisen Bank International-ը, Unicredit-ը, ING-ն, Commerzbank-ը, Deutsche Bank-ը, Intesa Sanpaolo-ն և OTP-ն , 2023 թվականին ՌԴ բյուջե են վճարել շուրջ 800 միլիոն եվրոյի հարկ, հայտնում է Financial Times-ը։
Սա չորս անգամ ավելին է, քան մինչև Ուկրաինա ռուսական զորքերի լայնամասշտաբ ներխուժումը. նախապատերազմյան 2021 թվականին եվրոպական բանկերը վճարել էին 200 միլիոն եվրոյի հարկ:
Բոլոր հարկային վճարումների կեսից ավելին բաժին է ընկնում ավստրիական Raiffeisen Bank International-ին, որն արտասահմանյան բանկերի թվում ամենամեծ ներկայությունն ունի Ռուսաստանում: 2021-2023 թվականներին RBI-ի ռուսական շահույթն ավելի քան եռապատկվել է՝ հասնելով 1,8 միլիարդ եվրոյի՝ կազմելով ավստրիական խմբի ընդհանուր շահույթի կեսը (մինչ պատերազմը Ռուսաստանին բաժին էր ընկնում RBI-ի շահույթի մոտ մեկ երրորդը):
Եվրոպական բանկերի ընդհանուր շահույթը Ռուսաստանում 2023 թվականին գերազանցել է երեք միլիարդ եվրոն, գրում է պարբերականը՝ վկայակոչելով նրանց հաշվետվությունը։
Raiffeisen Bank International-ը նախկինում հայտարարել էր, որ մտադիր է կրճատել իր ռուսական բիզնեսը, սակայն թերթը նշում է, որ Ռուսաստանում Raiffeisenbank-ի աշխատանքի հայտարարությունները ցույց են տալիս «հավակնոտ ծրագրեր»՝ բազմիցս ընդլայնելու իր հաճախորդների բազան:
Deutsche Bank-ը, OTP-ն և Commerzbank-ը զգալիորեն կրճատել են իրենց ներկայությունը Ռուսաստանում, հայտնել են բանկի ներկայացուցիչները։ Intesa-ն իր բիզնեսը վաճառելու գործընթացում է, իսկ UniCredit-ը հրաժարվել է մեկնաբանություններից:
Financial Times-ն իր հաշվարկներում չի ներառել ամերիկյան բանկերը, քանի որ դրանք չեն հրապարակել Ռուսաստանում իրենց աշխատանքի արդյունքները։
Ըստ Կիևի տնտեսագիտության դպրոցի տվյալների՝ հիմնվելով Ռուսաստանի Դաշնության Կենտրոնական բանկի տվյալների վրա, Citigroup-ը 2023 թվականին Ռուսաստանում վճարել է 53 միլիոն դոլարի հարկ և դարձել ՌԴ-ում գործող արևմտյան բանկերի մեջ չորրորդ խոշորագույն հարկատուն: Իր հերթին JPMorgan-ը, ըստ հետազոտական ինստիտուտի, վճարել է 6,8 մլն դոլար։
FT-ն գրում է, որ արևմտյան բանկերի հարկերը ցույց են տալիս, թե ինչպես են Ռուսաստանում մնացած օտարերկրյա ընկերություններն «օգնում Կրեմլին պահպանել ֆինանսական կայունությունը՝ չնայած արևմտյան պատժամիջոցներին»։
