16.01.2025 | 23:06
Ստամբուլի ընդդիմադիր քաղաքապետը Թուրքիայի իշխանություններին կոչ է արել իրեն դատել և հանգիստ թողնել իր կուսակցությանը
Ադրբեջանը չի կարող սասանել արցախցու վճռականությունը ապրել և արարել Արցախում. ԱՀ ԱԳՆ
Քաղաքականություն
10.01.2022 | 21:10
Արցախի Հանրապետության ԱԳՆ-ն հայտարարություն է տարածել հունվարի 10-ին ադրբեջանական կողմից զինադադարի ռեժիմի հերթական կոպիտ խախտման առնչությամբ, որով թիրախավորել են Արցախի Հանրապետության Մարտունու շրջանի Կարմիր շուկա-Թաղավարդ և Ասկերանի շրջանի Նախիջևանիկ համայնքների քաղաքացիները և քաղաքացիական օբյեկտները։ Այս մասին տեղեկանում ենք Արցախի ԱԳ նախարարությունից։
«Նման գործողություններն Ադրբեջանում պետական մակարդակով վարվող հայատյաց և նացիստական քաղաքականության դրսևորումներ են, որոնք ևս մեկ անգամ ապացուցում են, որ Ադրբեջանի իշխանությունների «խաղաղասիրական» հայտարարությունները ոչ մի աղերս չունեն այդ երկրի իրական՝ Արցախի, հայ ժողովրդի և տարածաշրջանի նկատմամբ ահաբեկչական և ծավալապաշտական նպատակների հետ»,- ասվում է հայտարարության մեջ։
Արցախի ԱԳՆ-ի գնահատմամբ՝ ռազմական գործողությունների դադարեցումից ի վեր Ադրբեջանի ագրեսիվ պահվածքը ձեռք բերված պայմանավորվածությունների, միջազգային իրավունքի նորմերի և մարդասիրության սկզբունքների կոպիտ խախտում է՝ միտված Արցախի Հանրապետության հասարակության ահաբեկմանը և ռուս խաղաղապահ առաքելության գործունեության խափանմանը։
«Հարկ ենք համարում ևս մեկ անգամ ընդգծել, որ նման քայլերով Ադրբեջանը չի կարող սասանել արցախցու վճռականությունը ապրել և արարել Արցախում, որի համար բացարձակապես անընդունելի է որևէ կարգավիճակ Ադրբեջանի կազմում»,- հայտարարել է Արցախի ԱԳՆ-ն՝ հավելելով. «Մենք շարունակելու ենք զարգացնել և զորացնել մեր հայրենիքը»։
