ԵԱՀԿ նախագահը հիշեցրել է Ղազախստանի ԱԳՆ ղեկավարին մարդու իրավունքները հարգելու պարտավորության մասին

ԵԱՀԿ նախագահ, Լեհաստանի արտգործնախարար Զբիգնև Ռաուն Ղազախստանի արտաքին գործերի նախարար Մուխթար Տլեուբերդիին հիշեցրել է մարդու իրավունքները հարգելու անհրաժեշտության մասին` ԵԱՀԿ շրջանակներում ստանձնած պարտավորություններին համապատասխան։

«Ղազախստանում տիրող իրավիճակը եղել է իմ հեռախոսազրույցի թեման Ղազախստանի արտաքին գործերի նախարար Մուխթար Թլեյբերդիի հետ։ Որպես ԵԱՀԿ նախագահ՝ ես ընդգծել եմ կազմակերպությունում մասնակցությունից բխող պարտավորությունների կատարման անհրաժեշտությունը, այդ թվում՝ մարդու իրավունքների հարգումը»,- գրել է Ռաուն Twitter-ում։

Հիշեցնենք, որ Ղազախստանում զանգվածային բողոքի ակցիաներ էին սկսվել հունվարի 2-ից։ Սկզբում Ժանաօզեն և Ակտաու քաղաքների բնակիչները դուրս էին եկել փողոց իրենց բողոքի ձայնը բարձրացնելու գազի թանկացման հետ կապված։ Ավելի ուշ բողոքի ակցաները տարածվել էին ամբողջ երկրով մեկ։ Իշխանությունները հայտնել էին, որ կվերանայեն գազի գինը, սակայն երկրում իրավիճակը չէր կայունացել։ Ղազախստանի նախագահ Կասիմ-Ժոմարտ Տոկաևը, բողոքի ցույցերի համատեքստում, հայտարարել էր, որ այսուհետ ինքն է Ղազախստանի Անվտանգության խորհրդի ղեկավարը։

Հիշեցնենք նաև, որ ՀՀ վարչապետ Նիկոլ Փաշինյանն ավելի վաղ հայտնել էր, որ Ղազախստանի Հանրապետության նախագահ Կասիմ-Ժոմարտ Տոկաևի դիմումի հիման վրա և Ղազախստանի ազգային անվտանգությանն ու ինքնիշխանությանը սպառնացող վտանգների բերումով, որն առաջացել է այդ թվում՝ արտաքին միջամտության հետևանքով, ՀԱՊԿ Հավաքական անվտանգության խորհուրդը Հավաքական անվտանգության պայմանագրի 4-րդ հոդվածի համաձայն՝ որոշում է կայացրել սահմանափակ ժամանակահատվածով Ղազախստանի Հանրապետություն ուղարկել ՀԱՊԿ հավաքական խաղաղապահ ուժեր՝ այդ երկրում իրավիճակի կայունացման և կարգավորման նպատակով:

Տաթև Ֆռանգյան