16.01.2025 | 09:53
«Հայաստան-ԵՄ ռազմավարական գործընկերության խթանումը Վիշեգրադյան քառյակի փորձի հիման վրա». ՈՒՂԻՂ
Ռուսաստանը հետաքրքրված է թուրքական ԱԹՍ-ների գնմամբ․ The National Interest
Քաղաքականություն
24.12.2021 | 18:17
Ռուսաստանը հետաքրքված է թուրքական արտադրության անօդաչու թռչող սարքերի ձեռքբերմամբ։ The National Interest-ում հրապարակված հոդվածում Փիթեր Սոչիու գրում է, որ թուրքական անօդաչուները ռուսական արտադրության մի շարք ՀՕՊ համակարգեր են խոցել։ Մոսկվան վիճարկում է այդ պնդումները, սակայն դա չի խանգարում Ռուսաստանին հետաքրքրություն ցուցաբերել թուրքական անօդաչու թռչող սարքերի նկատմամբ:
Թուրքիան դարձել է անօդաչու թռչող սարքերի (ԱԹՍ) խոշոր արտադրող, օգտագործող և վաճառող։ Զենքի արտահանումը մեծ բիզնես է, և 2019 թվականին կազմել է մոտ 27 միլիարդ դոլար: ԱՄՆ-ը շարունակում է մնալ աշխարհի խոշորագույն զենք արտադրողը, առաջատարներն են նաև ՌԴ-ն, Ֆրանսիան, Չինաստանը և Գերմանիան։
Հեղինակը գրում է, որ ՌԴ-ն նաև ավելացրել է զենքի ներմուծումը, այս ամիս էլ տեղեկություններ տարածվեցին, որ Մոսկվան կարող է դառնալ թուրքական ռազմական տեխնիկայի, մասնավորապես՝ անօդաչուների գնորդ։
Այս շաբաթ էլ Թուրքիայի ԱԳ նախարար Մևելութ Չավուշօղլուն հայտարարել էր, որ որևէ խնդիր չկա անօդաչուները կամ թուրքական այլ զենքերն ու ռազմական տեխնիկան Ռուսաստանին վաճառելու հարցում։
«Թուրքիան վաճառում է անօդաչուներ նրանց, ովքեր դրա անհրաժեշտությունն ունեն»,- ասել էր Չավուշօղլուն։
Խնդիրն այն է, որ 2019 թվականին Թուրքիան իր Bayraktar TB2 անօդաչու թռչող սարքերը վաճառել է Ուկրաինային։ Չնայած դրան՝ Չավուշօղլուն նշել է, որ Ուկրաինայի հետ գործարքը չպետք է խոչընդոտի Ռուսաստանին դրանց հնարավոր վաճառքին։
«Ուկրաինայի գործարքն ուղղված չէ Ռուսաստանի դեմ։ Եթե Ռուսաստանը մեր արտադրանքը գնելու անհրաժեշտություն ունենա, կարող է դրանք գնել, ինչպես մենք ավելի վաղ գնել ենք նրա C-400-ները»,- ասել է թուրք պաշտոնյան։
Թուրքիայի ԱԳՆ ղեկավարը նաև ասել է, որ Անկարան շարունակում է բանակցությունները ՌԴ-ի հետ՝ C-400 համակարգերի երկրորդ խմբաքանակի գնման շուրջ, չնայած նրան, որ ԱՄՆ-ն ու ՆԱՏՕ-ի մյուս դաշնակիցները հրապարակայնորեն բողոքել են այդ կապակցությամբ։ Ռուսական զենքի գնման պատճառով ԱՄՆ-ը նաև պատժամիջոցներ է սահմանել Թուրքիայի նկատմամբ։
Էմմա Չոբանյան
