ՄԱԿ-ը որևէ հավասարության նշան չի դրել. Դուք խեղաթյուրում եք իրականությունը. Կիրակոսյանը՝ Թովմասյանին․ ՏԵՍԱՆՅՈՒԹ

ԱԺ արտահերթ նիստում «Մարդու իրավունքների եվրոպական դատարանում Հայաստանի Հանրապետության ներկայացուցչի մասին» օրենքում փոփոխություններ և լրացումներ կատարելու մասին նախագծի քննարկման ժամանակ դիմելով հիմնական զեկուցող` ՀՀ վարչապետի աշխատակազմի Մարդու իրավունքների եվրոպական դատարանում Հայաստանի Հանրապետության ներկայացուցիչ Եղիշե Կիրակոսյանին՝ «Պատիվ ունեմ» խմբակցության պատգամավոր Թագուհի Թովմասյանը հարց ուղղեց՝ նշելով. «Ինչո՞ւ ՄԱԿ-ի միջազգային արդարադատության դատարանը Հայաստանի և Ադրբեջանի միջև հավասարության նշան դրեց: Մենք ունենք խոշտանգված գերիներ, անմարդկային վերաբերմունք է ցուցաբերվել մեր քաղաքացիների նկատմամբ, Հայաստան է ներխուժել ադրբեջանական զինուժ, ունենք ահռելի ագրեսիայի և պատերազմական հանցագործությունների փաստեր, արգելված զենքի կիրառման ապացույցներ, բայց այդ բոլորը հաշվի առնելով՝ Ադրբեջանը և Հայաստանը միջազգային դատարանում դրվեցին հավասար նժարների վրա, և հավասարության նշան դնելով՝ երկու երկրների նկատմամաբ ապահովվեց հայցի ապահովման միևնույն միջոց: Ինչո՞ւ չհաջողվեց այս փաստարկները ներկայացնել համոզիչ, որպեսզի հնարավոր լիներ դրանք օգտագործել Ադրբեջանի, այլ ոչ թե Հայաստանի դեմ»:

Եղիշե Կիրակոսյանը պատասխանեց՝ ընդգծելով, որ սխալ է այն մոտեցումը, թե հավասարության նշան է դրվել. «ՄԱԿ-ի արդարադատության դատարանը հավասարության նշան չի դրել Հայաստանի և Ադրբեջանի միջև, Ձեր ասածը հեռու է իրականությունից, ընդհակառակն՝ Հայաստանի կողմից ներկայացրած դիմումի հիման վրա կայացված որոշման համաձայն՝ պարտավորություններ են սահմանվել Ադրբեջանի նկատմամբ, առնվազն 4 միջոց բավարարվել է, իսկ Ադրբեջանի պահանջի դեպքում ունենք բովանդակային առումով մեկ միջոց բավարարված, երկրորդը ընդհանրական կոչ է՝ ուղղված երկու կողմերին: Ասելով, թե հավասարության նշան է դրվել երկու երկրների միջև, խեղաթյուրում եք իրականությունը»:

Մանրամասները՝ տեսանյութում: