Անկարայում ՌԴ դեսպանի սպանության կազմակերպիչներին չի հաջողվել խաթարել ռուս-թուրքական հարաբերությունները․ Զախարովա

Անկարայում ՌԴ դեսպան Անդրեյ Կառլովի սպանությունը նպատակ ուներ խաթարել ռուս-թուրքական հարաբերությունները և Սիրիայում կարգավորումը, այդ փորձերը անհաջողության են մատնվել։ Այս մասին այսօր հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ Կառլովի սպանության 5-րդ տարելիցի կապակցությամբ։

«Մենք հարգում ենք այն, որ Թուրքիայի դատական մարմինները վճռական կերպով դատապարտել են այդ բարբարոս ագրեսիան, որի անմեղ զոհը դարձավ ականավոր ռուս դիվանագետը։ Թուրք գործընկերների հետ միասին իրականացվել է այդ հանցագործության բոլոր հանգամանքների հետաքննություն։ Անկարայի հետ երկկողմ երկխոսության աստիճանական զարգացումը, ներառյալ՝ մի շարք առանցքային ոլորտներում, թույլ է տալիս ենթադրել, որ այս ոճրագործության կազմակերպիչների հիմնական նպատակն էր խաթարել այն ժամանակ երկկողմ հարաբերությունների կարգավորման գործընթացը և Սիրիայում իրավիճակը կայունացնելու հավաքական ջանքերն ու քաղաքական կարգավորումը։ Այդ ամբողջը լիակատար ձախողում է ապրել»,- ասել է Զախարովան։

Նշենք, որ Անդրեյ Կառլովը սպանվել է 2016 թվականի դեկտեմբերի 19-ին  Անկարայում լուսանկարչական ցուցահանդեսի բացման արարողության ժամանակ։ Հարձակվող ոստիկան Մևլութ Մերթ Ալթընթաշը տեղում չեզոքացվել է։ ՌԴ ԱԳՆ-ն տեղի ունեցածը որակել էր որպես ահաբեկչություն, ՌԴ Քննչական կոմիտեն քրեական գործ էր հարուցել՝ «Միջազգային ահաբեկչության ակտ» հոդվածով։ Դիվանագետին հետմահու շնորհվել է Ռուսաստանի հերոսի կոչում։

Մարտի 9-ին էլ Անկարայի ծանր հանցագործությունների դատարանը Կառլովի գործով 5 մեղադրյալներին ցմահ ազատազրկման է դատապարտել, 8-ին էլ՝ 5-ից 15 տարվա ազատազրկման, գործով անցնող ևս 6 անձ արդարացվել է։

Էմմա Չոբանյան