Քաղաքականություն
14.12.2021 | 17:45
ԱՄՆ պետքարտուղար Էնթոնի Բլինքենը մեղադրել է Չինաստանին հնդկախաղաղօվկիանոսյան տարածաշրջանում «ագրեսիվ գործողությունների» մեջ, որոնք սպառնում են ազատ բեռնափոխադրումներին և տարեկան ավելի քան 3 տրիլիոն դոլար արժողությամբ միջազգային առևտրին։
«Տարածաշրջանի երկրները ցանկանում են, որ այս վարքագիծը փոխվի, մենք՝ նույնպես»,- ասել է Բլինքենը Ինդոնեզիայի մայրաքաղաք Ջակարտայում ունեցած ելույթում:
Նա ընդգծել է, որ Վաշինգտոնը կաշխատի դաշնակիցների և գործընկերների հետ՝ «պաշտպանելու կանոնների վրա հիմնված կարգը»։
ԱՄՆ պետքարտուղարի խոսքով՝ Չինաստանն իր գործողություններով տարածաշրջանում լուրջ անհանգստություններ է առաջացրել։
«Հենց այս պատճառով էլ մենք որոշել ենք ապահովել Հարավչինական ծովում ազատ նավագնացությունը, որտեղ Պեկինի ագրեսիվ գործողությունները սպառնում են տարեկան 3 տրիլիոն դոլարից ավելի առևտրաշրջանառությանը»,- հայտարարել է Բլինքենը։
Հիշեցնենք, որ Միացյալ Նահանգները, Մեծ Բրիտանիան և Ավստրալիան, ռազմավարական կարևորություն ունեցող հնդկախաղաղօվկիանոսյան տարածաշրջանում Չինաստանի ազդեցության մեծացման ֆոնին, AUKUS դաշինքն են ստեղծել։
Տաթև Ֆռանգյան
