18.01.2026 | 10:13
Փակ են Ամբերդ ամրոց և Քարի լիճ տանող ավտոճանապարհները
Բայրամովը հայտարարել է, թե սահմանային լարվածությունից խուսափելու միակ միջոցը դելիմիտացիա սկսելն է
Քաղաքականություն
13.12.2021 | 12:29
Ադրբեջանի ԱԳ նախարար Ջեյհուն Բայրամովն անդրադարձել է հայ-ադրբեջանական սահմանին ադրբեջանական կողմի իրականացրած վերջին սադրանքերին՝ բնականաբար, մեղադրելով Հայաստանին։
Տեղական լրատվամիջոցների հաղորդմամբ՝ նա հայտարարել է, որ սահմանին լարվածությունից խուսափելու միակ միջոցը դելիմիտացիայի գործընթաց սկսելն է։
«Մինչև օրս Հայաստանը տարբեր պատրվակներով թույլ չի տալիս դելիմիտացիայի գործընթացի մեկնարկը, այնինչ դա միակ միջոցն է՝ խուսափելու սահմանին լարվածությունից։ Ցավոք, ժամանակ առ ժամանակ սահմանին տեղի են ունենում «սադրանքներ Հայաստանի կողմից», որի արդյունքում զոհվում են մարդիկ»,- ասել է Բայրամովը՝ հերթական անգամ սպառնալով Հայաստանին։
«Հայաստանը պետք է հասկանա, որ նման սադրանքների դիմելով՝ ոչնչի չի հասնի։ Հետևանքները լինելու են շատ ծանր ու ցավալի։ Մենք գտնում ենք՝ Հայաստանը պետք է հրաժարվի նման գործողություններից»,- ասել է Ադրբեջանի ԱԳ նախարարը։
Հիշեցնենք, որ Ադրբեջանի ԶՈՒ-ն օրերս կրկին նախահարձակ գործողությունների էր դիմել, որի հետևանքով հայկական կողմն ունեցավ 1 զոհ ու մեկ տասնյակ վիրավորներ։
Հավելենք նաև, որ Հայաստանը բազմիցս հանդես է եկել դելիմիտացիայի գործընթացի մեկնարկի անհրաժեշտության մասին հայտարարություններով, սակայն ադրբեջանական կողմը դրանց չի արձագանքել։
Ի դեպ, Բայրամովը նաև խոսել է ականապատ տարածքների քարտեզներից ու կրկին բողոքել դրանց անճշտությունից։ Նա նշել է, որ քարտեզների ճշգրտությունը կազմում է 25 տոկոս։
Էմմա Չոբանյան
