18.12.2025 | 23:24
ՀՀ տարածքում ավտոճանապարհները հիմնականում անցանելի են
Ադրբեջանական Մեջլիսն արձագանքել է Կիպրոսի Ներկայացուցիչների պալատի՝ ՀՀ-ի և Արցախի դեմ Բաքվի ագրեսիան դատապարտող բանաձևին
Քաղաքականություն
10.12.2021 | 19:35
Ադրբեջանի Միլլի Մեջլիսի արտաքին հարաբերությունների և միջխորհրդարանական կապերի հանձնաժողովն արձագանքել է ավելի վաղ Կիպրոսի Ներկայացուցիչների պալատի ընդունած՝ «Հայերի նկատմամբ Ադրբեջանի շարունակական ագրեսիան և Լեռնային Ղարաբաղում ընթացիկ իրավիճակի վերաբերյալ» բանաձևին, գրում է ադրբեջանական Trend գործակալությունը։
Հայտարարության մեջ «խիստ բողոք է արտահայտվում Կիպրոսի Հանրապետության Ներկայացուցիչների պալատի սադրիչ, անհիմն և կեղծ բանաձևի դեմ»։
«Կիպրացի պատգամավորների ուշադրությունն ենք հրավիրում այն հանգամանքի վրա, որ նման սադրանքները՝ ուղղված տարածաշրջանի ապակայունացմանը, ծառայում են ուժերին, որոնք «30 տարի ապօրինաբար Ադրբեջանի 20 տոկոսը օկուպացիայի տակ էին պահում»։ Անցել է ավելի քան մեկ տարի Ադրբեջանի, ՌԴ-ի և Հայաստանի ղեկավարների ստորագրած եռակողմ հայտարարությունից, որը վերջ դրեց պատերազմին և ստեղծեց պայմաններ՝ տարածաշրջանում խաղաղ կյանքի նոր փուլի համար»,- ասվում է ադրբեջանական հայտնի թեզերը պարունակող հայտարարության մեջ։
Հիշեցնենք, որ Կիպրոսի ներկայացուցիչների պալատը դեկտեմբերի 3-ին ընդունված բանաձևով դատապարտում է Ադրբեջանի ագրեսիան Հայաստանի և Արցախի դեմ, պահանջում է ի կատար ածել 2020 թվականի նոյեմբերի 9-ի եռակողմ հայտարարության դրույթները, այդ թվում՝ գերիների անհապաղ ազատ արձակումը:
Միաժամանակ, այն կոչ է անում միջազգային հանրությանը՝ գործել այնպես, որ դադարի Ադրբեջանի ագրեսիան Հայաստանի նկատմամբ, ինչպես նաև հորդորում միջազգային կառույցներին՝ հումանիտար աջակցություն ցուցաբերել Արցախի բնակչությանը: Բանաձևը նաև դատապարտում է Թուրքիայի ներգրավվածությունը Լեռնային Ղարաբաղի դեմ սանձազերծված պատերազմում:
Էմմա Չոբանյան
