14.09.2026 | 10:58
Բեռլինում նշվել է Հայաստանի անկախության 35-ամյակը․ ընդգծվել է ՀՀ–Գերմանիա ռազմավարական գործընկերության խորացումը
Ադրբեջանը կրկին բողոքում է ականապատ տարածքների քարտեզների անճշտությունից՝ դրանք անօգուտ համարելով
Քաղաքականություն
08.12.2021 | 20:45
Բաքուն կրկին բողոքում է ականապատ տարածքների քարտեզների ճշգրտությունից և անհիմն մեղադրում Երևանին։ Մասնավորապես, երկրի ականազերծման գործակալության՝ ANAMA-ի վարչության նախագահ Վուգար Սուլեյմանովը նշել է, որ, իբր, նախորդ շաբաթ Հայաստանի կողմից Ադրբեջանին փոխանցված ականապատ դաշտերի քարտեզների ձևաթղթերը, նախնական տվյալներով, ճշգրիտ չեն, գրում են տեղական լրատվամիջոցները։
«Ուզում եմ նշել՝ նախնական դիտարկումից տպավորություն է ստեղծվում, որ դրանք հուսալի չեն, անօգուտ են և ոչ ճշգրիտ։ Բազմակողմանի ուսումնասիրությունից հետո հանրությանը կտեղեկացնենք՝ որքանով ենք դրանք ճշգրիտ և որ տարածքներն են ընդգրկում»,- ասել է Սուլեյմանովը։
Նա նշել է, որ ANAMA-ն և երկրի ՊՆ-ն արդեն սկսել են քարտեզների վերլուծությունն ու մշակումը։
Սուլեյմանովը նաև հավելել է, որ նախկինում ևս Հայաստանի տրամադրած քարտեզների ճշգրտությունը «մեծ չի եղել՝ կազմելով 25 տոկոս»։
Հավելենք, որ Հայաստանն Ադրբեջանին ականապատ դաշտերի քարտեզների փոխանցման պարտավորություն չունի, ինչը նախօրեին փաստեց նաև ՄԱԿ-ի Արդարադատության միջազգային դատարանը։ Հիշեցնենք, որ ՀՀ-ի դեմ Ադրբեջանի ներկայացրած հիմնական պահանջը՝ կապված ականապատ տարածքների քարտեզների պարտադիր տրամադրման հետ, միջազգային դատարանը մերժել է։
Էմմա Չոբանյան
