Քաղաքականություն
08.12.2021 | 14:42
Ադրբեջանը նախատեսում է 2022 թվականին Հայաստանի դեմ մի քանի հայց ներկայացնել, իբր, միջազգային կոնվենցիաների խախտման առնչությամբ։ Այս մասին այսօր հայտարարել է Ադրբեջանի ԱԳ փոխնախարար Էլնուր Մամեդովը, փոխանցում են ադրբեջանական լրատվամիջոցները։
«Հաջորդ տարի Ադրբեջանը ծրագրում է Հայաստանի դեմ մի քանի հայց ներկայացնել՝ կապված մի շարք կոնվենցիաների խախտման հետ»,- ասել է Մամեդովը։
Նա նշել է, որ բողոքները ներկայացվելու են երկու ուղղություններով։
«Հայցերից մեկը վերաբերելու է շրջակա միջավայրին հասցված վնասի չափերին։ Եվ, իհարկե, գործող որոշ կոնվենցիաների շրջանակում նախատեսվում է բարձրացնել այդ տարածքներում շրջակա միջավայրին հասցված վնասի հետ կապված հարցը։ Մյուս հայցը վերաբերելու է էներգետիկ ռեսուրսներին։ Հայաստանի կողմից էներգառեսուրսների ապօրինի օգտագործման և շահագործման փաստերը հավաքագրվում են, և մենք պատրաստվում ենք այդ կապակցությամբ պահանջներ ներկայացնել»,- ասել է Մամեդովը։
Նա, սակայն, չի հայտնել, թե որ միջազգային ատյաններին է դիմելու Բաքուն։
Հավելենք, որ Արցախյան 44-օրյա պատերազմի ավարտից հետո Ադրեջանը մշտապես հայտարարում է, որ միջազգային ատյաններում տարբեր դատական հայցեր է ներկայացնելու Հայաստանի դեմ, սակայն դեռևս միայն հակընդդեմ հայցերով պատասխանում է Երևանի դիմումներին։ Նշենք, որ Հայաստանն Ադրբեջանի դեմ հայցեր է ներկայացրել ՄԻԵԴ և ՄԱԿ-ի Արդարադատության միջազգային դատարան։
Էմմա Չոբանյան
