Ադրբեջանական ագրեսիան շարունակվելու պոտենցիալ ունի․ Ալիևը ձգտելու է Սյունիքը գրավել՝ խնդրի լուծում չի ուզում․ Ռուբեն Մելքոնյան. ՏԵՍԱՆՅՈՒԹ

Factor TV-ի հարցազրույցը թուրքագետ Ռուբեն Մելքոնյանի հետ

-Պարո՛ն Մելքոնյան, եթե 44-օրյա պատերազմը դիտարկենք իբրև տարածաշրջանային երկրաշարժի հերթական փուլ, ըստ Ձեր գնահատականի՝ արդյո՞ք գնալով ցնցումները դանդաղում են։ Սոչիում հանդիպեցին ՀՀ-ի, ՌԴ-ի, Ադրբեջանի ղեկավարները, Բրյուսելում են երկրորդ անգամ հանդիպելու դեկտեմբերի 15-ին։ Կողմերը, այնուամենայնիվ, այս խոշոր կորուստներից հետո փորձում են լուծումնե՞ր գտնել, թե՞ հետցնցումների տեմպն արագացնել նորից։ Կողմեր ասելով՝ միայն ՀՀ-ն և Ադրբեջանը նկատի չունեմ։

-Առաջինը՝ արդյո՞ք Ադրբեջանի նպատակներն ի կատար են ածվել։ Ես կարծում եմ՝ ոչ, հետևաբար՝ խոշորամասշտաբ ցնցում, պատերազմ այս պահին չկա, բայց սողացող օկուպացիոն տրամադրությունները շարունակվում են։ Դրան տարբեր անուններ կարելի է տալ՝ «Զանգեզուրի միջանցք», ճանապարհ, ապաշրջափակում և այլն։ Իսկ ինչո՞ւ է Ադրբեջանի համար այդքան կարևոր «Զանգեզուրի միջանցք» կոչվածը։ Դա ցամաքային ճանապարհ է, որ միացնելու է Ադրբեջանը բռնազավթված Նախիջևանի հետ։

-Ինչպես նաև ապաշրջափակվելիք ճանապարհով Ադրբեջանը ցամաքային ուղիղ կապ է ստանալու Թուրքիայի հետ, միայն Ադրբեջանը Նախիջևանին կապող ճանապարհ չի լինելու դա։

-Այո՛, բնականաբար՝ նաև Թուրքիայի հետ, և եթե նայենք քարտեզին՝ Ադրբեջանը մի պետություն է, որի մի հատվածն իր հետ կապ չունի լիովին տարածքային առումով։ Ադրբեջանը ձգտելու է ապահովել այդ տարածքային կապը, որը կոչում է «Զանգեզուրի միջանցք», որը միայն ու միայն անցնելու է ՀՀ սուվերեն տարածքով։ Բայց արդյո՞ք Ադրբեջանը փորձելու է դա անել միջազգային ընդունված նորմերի շրջանակում, թե՞ օկուպացիոն ոճը շարունակելու է, և արդյո՞ք բավարարվելու է ՀՀ-ի տված ճանապարհով, և արդյո՞ք իր կապը Նախիջևանի հետ պայմանավորելու է միայն ՀՀ-ի՝ ճանապարհ տալով կամ չտալով։

-ՀՀ-ն նաև իրավունք կունենա մեկ օր էլ փակել այդ ճանապարհը։

-Այո՛, հետևաբար, այս ամենը նշանակում է՝ ադրբեջանական ագրեսիան շարունակվելու լիովին պոտենցիալ ունի, որովհետև նա ձգտելու է, ի վերջո, գրավել Սյունիքը։

Հարցազրույցն ամբողջությամբ՝ տեսանյութում։

Ռոբերտ Անանյան