Քաղաքականություն
18.11.2021 | 14:37
Ռուսաստանն ու Թուրքիան պայմանավորվել են S-400 զենիթահրթիռային համակարգերի մասերի համատեղ արտադրության վերաբերյալ որևէ հայտարարություն չանել։ Այս մասին ասել է Թուրքիայի նախագահ Ռեջեփ Թայիփ Էրդողանը Անկարայում Իսպանիայի վարչապետ Պեդրո Սանչեսի հետ բանակցություններից հետո կայացած մամուլի ասուլիսում։
«Ինչ վերաբերում է S-400-ների մասերի համատեղ արտադրությանը, ապա երկու կողմերը՝ Թուրքիան ու Ռուսաստանը, պայմանավորվել են որևէ մանրամասներ չբացահայտել»,- ասել է Էրդողանը։
Նա նաև նշել է, որ այդ թեման «զգայուն է ՌԴ-ի ու Թուրքիայի համար»։
Սեպտեմբերին էլ Սոչիում ՌԴ նախագահ Վլադիմիր Պուտինի ու Թուրքիայի նախագահ Ռեջեփ Թայիփ Էրդողանի հանդիպման ընթացքում, ըստ Կրեմլի խոսնակ Դմիտրի Պեսկովի, կողմերը քննարկել էին ռազմատեխնիկական ոլորտում համագործակցության հնարավոր շարունակման, ինչպես նաև Թուրքիայի տարածքում S-400-ների որոշ բաղադրիչներ արտադրելու հնարավորության հարցերը։
Հավելենք, որ ռուսական այս համալիրների գնման պատճառով ԱՄՆ-ն պատժամիջոցներ է սահմանել Թուրքիայի նկատմամբ։
Էմմա Չոբանյան
