18.01.2026 | 13:48
Օդի ջերմաստիճանը հունվարի 20-22-ին կնվազի 7-10 աստիճանով
Թուրքիայի և ԱՄՆ-ի ՊՆ պատվիրակությունները քննարկել են Հարավային Կովկասի անվտանգության հարցերը
Քաղաքականություն
18.11.2021 | 14:12
ԱՄՆ պաշտպանության գերատեսչության խոսնակ, փոխգնդապետ Անտոն Սեմելրոթը մանրամասներ է ներկայացրել նոյեմբերի 16-ին Վաշինգտոնում կայացած ԱՄՆ-Թուրքիա բարձր մակարդակի պաշտպանության խմբի հանդիպման մասին,որի քննարկման թեմաներից է եղել նաև իրավիճակը Հարավային Կովկասում։ Այս մասին տեղեկանում ենք ԱՄՆ պաշտպանական գերատեսչության պաշտոնական կայքից։
«Հիմնվելով ԱՄՆ նախագահ Բայդենի ու Թուրքիայի նախագահ էրդողանի, ինչպես նաև պաշտպանության նախարար Օսթինի և ազգային պաշտպանության նախարար Աքարի վերջին խոսակցությունների վրա՝ պատվիրակությունները քննարկել են տարածաշրջանային հարցերի լայն շրջանակ։ Այն ներառում է անդրազգային առաջնահերթությունները, ինչպիսիք են ահաբեկչության դեմ պայքարն ու տարածաշրջանային անվտանգությունը Աֆղանստանում, Աֆրիկայում, Հարավային Կովկասում, Արևելյան Միջերկրականում ու Մերձավոր Արևելքում»,- ասվում է հաղորդագրության մեջ։
Նշվում է, որ կողմերը քննարկել են նաև երկկողմ պաշտպանական համագործակցությունը, երկարամյա պաշտպանական կապերը ընդլայնելու ընդհանուր նպատակը։ ԱՄՆ պաշտպանության նախարարի օգնականի պարտականությունները կատարող Լաուրա Կուպերը վերահաստատել է ԱՄՆ-ի կողմից Թուրքիայի ռազմական արդիականացման կարիքների ճանաչումը՝ ՆԱՏՕ-ի աջակցությամբ։
Պատվիրակությունները պայմանավորվել են հաջորդ հանդիպումն անցկացնել Անկարայում։
Նշենք, որ հանդիպման մասին նախօրեին թուրքական կողմն էր հաղորդագրություն տարածել՝ նշելով, որ այն անցել է կառուցողական ու դրական մթնոլորտում։
Էմմա Չոբանյան
