18.01.2026 | 13:48
Օդի ջերմաստիճանը հունվարի 20-22-ին կնվազի 7-10 աստիճանով
Թուրքիայի «Աքքույու» ատոմակայանի շինարարության ընթացքում ռուս և թուրք աշխատակիցներ են մահացել
Քաղաքականություն
15.11.2021 | 19:36
Թուրքիայի «Աքքույու» ատոմակայանի շինարարության ընթացքում երեք աշխատակից է մահացել։ Այս մասին գրում է Duvar-ը՝ վկայակոչելով Cumhuriyet պարբերականը։
Ըստ աշխատակիցներից մեկի, որն անանունության պայմանով խոսել է պարբերականի հետ, աշխատողները, որոնցից մեկը ռուս է, մահացել են վերջին 10 օրվա ընթացքում։
Նրանցից մեկը 30-ամյա Էմրահ Բալլըն է, որը, ենթադրվում է, հոսքահարվել է նոյեմբերի 10-ին։ Մյուս աշխատողները փորձել են փրկել Բալլըին, սակայն տեղում մահացել են։
«Նա պետք է ջրի բաքը մտներ անվտանգության փորձագետի ու անձնակազմի ղեկավարի հետ»,- ասել է բանվորը թուրքական պարբերականին։
Երկրորդ աշխատակիցը, ըստ նույն աղբյուրի, մահացել է նոյեմբերի 11-ին բարձր վայրից ընկնելու հետևանքով։ Ռուս բանվորը ևս մահացել է բարձր վայրից ընկնելուց, երբ ուժեղ քամու հետևանքով տախտակը ոտքի տակից սահել է։
Ըստ աղբյուրի՝ շինարարության պատասխանատուները չեն արժևորում աշխատողների կյանքը, բացի այդ՝ չեն ցանկանում, որպեսզի մյուս աշխատակիցները լսեն մահերի մասին և փորձում են թաքցնել իրենց անփութությունը։
Նշենք, որ «Աքքույու» ատոմակայանի վերաբերյալ միջկառավարական համաձայնագիրը Թուրքիայի և ՌԴ-ի միջև կնքվել է 2010 թվականի մայիսին։ Առաջին էներգաբլոկի գործարկումը նախատեսվում է 2023 թվականին, երբ Թուրքիան կտոնի հանրապետության 100-ամյակը։ Մյուս երեք էներգաբլոկները շահագործվելու են մինչև 2026-ի ավարտը։
Էմմա Չոբանյան
