Քաղաքականություն
15.11.2021 | 16:58
Հավաքական անվտանգության պայմանագրի կազմակերպությունը (ՀԱՊԿ) նոյեմբերի 17-19-ը Տաջիկստանում կանցկացնի «Կոբալտ-2021» հատուկ նշանակության զորավարժություններ։ «Ինտերֆաքս»-ի հաղորդմամբ՝ այս մասին հայտնել է Կենտրոնական ռազմական օկրուգը:
«Վարժանքները նոյեմբերի 17-19-ին կանցկացվեն Տաջիկստանի Հանրապետության «Ֆահրաբադ» զինափորձարանում: Ռուսաստանի զորակազմը վարժանքներում ներկայացված է ԿՌՕ-ի հատուկ նշանակության ստորաբաժանումների և 201-րդ ռազմաբազայի հետախուզական գումարտակի զինծառայողներով»,- ասված է մամուլի ծառայության տարածած հաղորդագրության մեջ:
Ընդհանուր առմամբ, ռուսական կողմից զորավարժություններին կներգրավվի շուրջ 60 զինծառայող և տասը միավոր զինտեխնիկա, այդ թվում՝ 201-րդ ռազմակայանի երկու Մի-8MTV5-1 ուղղաթիռ, հաղորդում են ռազմական շրջանից։ Ըստ ռուս զինվորականների՝ զորավարժությունների ակտիվ փուլում պայմանականորեն զինյալների կողմից գրավված շենքը արգելափակելու և գրոհելու գործողություն կիրականացվի՝ օգտագործելով տեխնիկական հետախուզական տեխնիկա և ուղղաթիռներ։
Կենտրոնական ռազմական օկրուգի տվյալներով՝ «Կոբալտ-2021» զորավարժություններում, բացի Ռուսաստանից, կմասնակցեն նաև ՀԱՊԿ անդամ երկրներից Հայաստանի, Բելառուսի, Ղազախստանի, Տաջիկստանի և Ղրղզստանի օպերատիվ հակազդման կոլեկտիվ ուժերի, հատուկ նշանակության ուժերի, ներքին գործերի մարմինների, պետական անվտանգության, նախարարությունների և արտակարգ իրավիճակների ու թմրանյութերի վերահսկողության գերատեսչությունների կազմավորումները:
Զորավարժությունների նպատակն է՝ հավաքական անվտանգության շրջաններում համատեղ ու օպերատիվ-մարտական միջոցառումների նախապատրաստման ու անցկացման արդյունավետության բարձրացումը։
Տաթև Ֆռանգյան
