Անվտանգության խորհրդի նիստ տեղի ունեցե՞լ է․ պաշտոնական աղբյուրները լռում են

Հայաստանյան լրատվամիջոցներից մեկը քիչ առաջ տեղեկություն է հրապարակել այն մասին, որ երեկ՝ նոյեմբերի 14-ին, Անվտանգության խորհրդի անդամները հավաքվել են կառավարությունում, որտեղ վարչապետ Նիկոլ Փաշինյանի գլխավորությամբ տեղի է ունեցել Անվտանգության խորհրդի նիստ: Ըստ կայքի՝ նիստ է նախատեսվում անցկացնել նաև այսօր կեսօրին։

Քանի որ օրեր առաջ վարչապետի մամուլի քարտուղարի պաշտոնից ազատման դիմում ներկայացրած Մանե Գևորգյանին մինչ այս պահը փոխարինող չկա, Factor.am-ը տեղեկությունը փորձեց ճշտել ԱԽ քարտուղարի խոսնակ Տաթևիկ Պետրոսյանից, սակայն մեր հեռախոսազանգերը մնացին անպատասխան։

Ստացվում է, սահմանային  լարվածության պայմաններում այս կարևորագույն մարմնի նիստը կամ գաղտնի է կայանում, կամ պաշտոնական որևէ ինֆորմացիա  չի հաղորդվում։ Վարչապետի և ԱԽ քարտուղարի պաշտոնական կայքէջերը ևս լռում են։

Հիշեցնենք՝ երեկ երեկոյան Ազգային անվտանգության ծառայությունը հայտարարեց, որ կեսգիշերին՝ ժամը 00։00-ին Կապան-Ճակատեն ավտոճանապարհի ադրբեջանական վերահսկողության տակ գտնվող հատվածում սահմանային և մաքսային հսկողություն իրականացնելու նպատակով ադրբեջանական կողմը կտեղակայի անցակետ։ Հայկական կողմը հայելային եղանակով նշված ավտոճանապարհին նույնպես կտեղակայի հսկողության կետեր։

Ավելի վաղ՝ ժամը 13։00-ի սահմաններում, ադրեջանական ԶՈՒ ստորաբաժանումները փորձել են դիրքային առաջխաղացում ապահովել հայ-ադրբեջանական սահմանի արևելյան ուղղությամբ։ Սկսվել է ինտենսիվ փոխհրաձգություն, հայ դիրքապահները կանխել են հակառակորդի փորձերը՝ դիրքավորվելու այդ տարածքում։ Ժամը 19։00-ի դրությամբ՝ ՊՆ-ն հայտնեց, որ կրակոցներ չկան։ Ընթանում են բանակցություններ՝ իրադրության հանգուցալուծման նպատակով։ 

Ռոզա Վարդանյան