Քաղաքականություն
11.11.2021 | 18:18
Թուրքական «Բայքար» ընկերությունը, որն արտադրում է «Բայրաքթար» անօդաչու թռչող սարքերը, շուտով երկու նոր անօդաչու է փորձարկելու, որոնք մեծացնում են Թուրքիայի հնարավորությունները՝ ցամաքայինից մինչև ծովային օպերացիաներ։ Այս մասին հայտարարել է ընկերության ղեկավարը, գրում է Duvar-ը։
Հալուք Բայրաքթարը, որը երկու ինժեներ եղբայրներից մեկն է ու ղեկավարում է ընկերությունը, ասել է, որ նոր անօդաչուները փորձարկվելու են հաջորդ երկու տարիներին և կկարողանան օդ բարձրանալ ներկայում արտադրվող թուրքական ռազմածովային ուժերի նավից:
«Խելացի անօդաչու թռչող սարքերի համակարգերը երկու առաջատար տեխնոլոգիաներն են, որոնք փոխեցին էներգիայի նախագծման լանդշաֆտը։ Բոլորը խոսում են՝ ինչպես անօդաչուների տեխնոլոգիան փոխեց մարտական դոկտրինները։ Մեր հաջորդ նպատակը TB3 անօդաչուն է, որն ունակ կլինի թռչել և վայրէջք կատարել TCG Anadolu-ից»,- ասել է Բայրաքթարը՝ նշելով, որ կան նաև թեթև ավիակրի ծրագրեր։
Չնայած նավը կկարողանա մարտական ուղղաթիռներ տեղափոխել, Թուրքիան չի շահագործում ինքնաթիռ, որը կարող է թռիչք կատարել նավից: TB3-ը՝ ծալովի թևերի դիզայնով, կարող է տեղակայվել ծովային կարճ թռիչքուղուց:
Բայրաքթարը նաև նշել է, որ քանի որ որոշ մասեր արտադրվում են, սպասվում է, որ առաջին թռիչքը տեղի կունենա հաջորդ տարի։ Նա տեղեկացրել է, որ դրան հաջորդելու է անօդաչու մարտական ինքնաթիռը, որը կոչվում է MUIS․ առաջին նախատիպի թռիչքը սպասվում է 2023 թվականին։
Էմմա Չոբանյան
