09.06.2026 | 00:17
Մարկո Ռուբիոն շնորհավորել է Փաշինյանին
Արմեն Գրիգորյանը գուցե ասի՞՝ Գորիսի ճանապարհով անցնելիս ում ենք վճարելու և ինչ արժույթով. Թագուհի Թովմասյան․ ՏԵՍԱՆՅՈՒԹ
Քաղաքականություն
11.11.2021 | 15:17
Մենք կառավարությունից արձագանք չունենք, ինչը նշանակում է՝ կառավարությունը խուսափեց պարզաբանումներ տալ ՀՀ սահմանի փոփոխության վերաբերյալ։ Գորիս-Կապան ճանապարհին ադրբեջանական մաքսակետ տեղադրելու հարցի քննարկման համար հրավիրված ԱԺ հրատապ նիստում նշեց ԱԺ մարդու իրավունքների հանձնաժողովի նախագահ Թագուհի Թովմասյանը։
«Ըստ էության տեղի է ունեցել սահմանագծում և սահմանազատում։ Փաստացի Հայաստանի սահմանները փոփոխվել են, մենք նոր ճանապարհ ենք կառուցել։ Ստացվում է՝ այս գործընթացների համար չունենք իրավական որևէ հիմնավորում»,-նշեց Թագուհի Թովմասյանը։
«Ի՞նչ քարտեզներով և ինչ հիմքով է հայտարարվել, որ Գորիս-Կապան ճանապարհի այդ տարածքն Ադրբեջանինն է։ Պատգամավորը նկատեց՝ եթե Հայաստանում կան ուժային կառույցներ, կա գլխավոր դատախազություն, որը սպասարկում է պետական շահը, ապա պետք է քրեաիրավական բնույթի գնահատական տա այս գործողություններին, քանի որ սրանք պետության ինքնիշխան տարածքի նկատմամբ ակնհայտ ոտնձգություններ են»,- նշեց պատգամավորը:
Անդրադառնալով ԱԽ քարտուղարի այն հայտարարությանը, թե Գորիս-Կապան ճանապարհի ադրբեջանական մաքսակետերի մոտ ՀՀ քաղաքացիները հնարավոր է վճարեն և կարողանան անցնել, Թագուհի Թովմասյանը նշեց՝ գուցե պարզաբանե՞ն, թե ինչ արտարժույթով ու որքան պետք է վճարեն, ինչքան է մաքսատուրքը. «Գուցե պարզաբանե՞ն, որ ՀՀ քաղաքացիները հասկանան, թե ինչքան են վճարելու իրենց տարածքով անցնելու համար»,- նշեց պատգամավորը՝ հավելելով, որ այս ամենը զավեշտալի է։
Թագուհի Թովմասյանը նաև ընդգծեց, որ խաղաղության օրակարգը պատերազմի սպառնալիքի տակ չի ձևավորվում:
«Եթե խաղաղության օրակարգ ունեիք, ուրեմն պետք էր 2018-ին հայտարարել, որ իշխանության եք գալիս խաղաղության օրակարգով, և ասեիք, թե որն է խաղաղության գինը։ Այդ ժամանակ ժողովուրդը թող իր գնահատականը տար և ընտրությունը կատարեր՝ ուզու՞մ է խաղաղության համար վճարել այդ գինը, թե ոչ»,-նշեց պատգամավորը՝ հավելելով, որ այս իրավիճակում ուղղակի հայտարարել, թե մանդատ ունեն, որևէ մեկին իրավունք չի վերապահում միանձնյա որոշումներ կայացնել ՀՀ պետական սահմանների փոփոխության հետ կապված։
Մանրամասները՝ տեսանյութում:
