11.10.2026 | 18:49
Թրամփը կրկին հայտարարել է, որ Ռուսաստանն ու Ուկրաինան համաձայնության են եկել էներգետիկ հրադադարի շուրջ
Չավուշօղլուն հայտարարել է, որ թյուրքալեզու երկրները կամրապնդեն իրենց դիրքերը միջազգային ասպարեզում
Քաղաքականություն
11.11.2021 | 15:35
Չավուշօղլուն հայտարարել է, որ թյուրքալեզու երկրները կամրապնդեն իրենց դիրքերը միջազգային ասպարեզումԹուրքիան հանդես է գալիս թյուքալեզու պետությունների համագործակցության ճանապարհին բոլոր խոչընդոտների վերացման օգտին։ Նման հայտարարությամբ է հանդես եկել Թուրքիայի ԱԳ նախարար Մևլութ Չավուշօղլուն Ստամբուլում Թյուրքալեզու պետությունների համագործակցության խորհրդի անդամ պետությունների ԱԳ նախարարների 8-րդ նիստում, գրում է «Անադոլու» գործակալությունը։
Չավուշօղլուն կրկին շնորհավորել է Ադրբեջանին՝ «Արցախյան պատերազմում հաղթանակի կապակցությամբ» և նշել, որ «Ադրբեջանի հաղթանակը տարածաշրջանում երկարատև խաղաղության և կայունության ճանապարհ է բացել»։
Թուրք պաշտոնյան թյուրքալեզու պետություններին համեմատել է մեկ ծառի ճյուղերի հետ։
«Չմոռանալով սեփական արմատների մասին ու զարգացնելով համագործակցությունը՝ մեր երկրները կամրապնդեն իրենց դիրքերը միջազգային ասպարեզում»,- ասել է Չավուշօղլուն՝ հավելելով, որ համաշխարհային քաղաքականության մեջ աճում է ասիական տարածաշրջանի դերը։
Նա ասել է, որ Թյուրքալեզու պետությունների համագործակցության խորհրդի անդամ պետությունների ղեկավարների առաջիկա գագաթնաժողովի օրակարգում կարևոր հարցեր կան։
«Առաջին հերթին քննարկվելու է Թուրքմենստանի դիտորդի կարգավիճակի հարցը։ Դա թույլ կտա կազմակերպությանն ընդգրկել բոլոր թյուրքալեզու պետությունները»,- ասել է Չավուշօղլուն։
Բացի այդ, նախատեսվում է փոխել կազմակերպության անվանումը՝ դարձնելով Թյուրքական պետությունների կազմակերպություն։
«Մեզ պետք է միավորեն ոչ միայն պատմական ու մշակութային արմատները, այլև հետագա զարգացման տեսլականը»,- ասել է Չավուշօղլուն։
Ըստ նրա՝ թյուքալեզու պետությունները պետք է որոշեն գործընթացների զարգացումը, և ոչ թե արձագանքեն դրանց։ Եվ դա միայն այն դեպքում, եթե լինեն արագ որոշումներ կայացնելու մեխանիզմներ։
Նշենք, որ ԱԳ նախարարների հանդիպումը նախորդում է Թյուրքական խորհրդի ղեկավարների գագաթնաժողովին, որին մասնակցելու են Թուրքիայի նախագահ Ռեջեփ Թայիփ Էրդողանը, Ադրբեջանի նախագահ Իլհամ Ալիևը, Ղազախստանի նախագահ Կասիմ-Ժոմարտ Տոկաևը, Ղրղզստանի նախագահ Սադիր Ժապարովը, Ուզբեկստանի նախագահ Շավքաթ Միրզոևը և Թուրքմենստանի նախագահ Կուրբանգուլի Բերդիմուհամեդովը։ Առաջիկա գագաթնաժողովի մասնակիցների թվում են նաև Հունգարիայի վարչապետ Վիկտոր Օրբանը և Թյուրքական խորհրդի գլխավոր քարտուղար Բաղդադ Ամրեևը։
Էմմա Չոբանյան
