Քաղաքականություն
11.11.2021 | 12:38«Հայաստանն առաջիկայում սպասվող մեծ գործընթացներում՝ սկսած սահմանային դելմիտացիա-դեմարկացիա գործընթացից, վերջացրած Սյունիքի հետ կապված տարբեր հարցերով, միանգամից նեղացնում է իր բանակցային հնարավորությունները, ի սկզբանե Ադրբեջանին լեգիտիմ հնարավորություն և իրավունք է տալիս՝ Սյունիքի հատվածում վարվել այնպես, ինչպես վարվել է պատերազմից հետո»,- այս մասին Կառավարության շենքի մոտ բողոքի ակցիայի ժամանակ լրագրողների հետ զրույցում նշեց ԱԺ «Պատիվ ունեմ» խմբակցության պատգամավոր Տիգրան Աբրահամյանը։
Պատգամավորի դիտարկմամբ՝ Սյունիքում այլընտրանքային ճանապարհը քաղաքական առումով այստեղ որևէ լուծում չի տալիս։ «Հասկանալի է, որ պետք է լինի ճանապարհ, որը պետք է ապահովի դեպի Կապան, Քաջարան, մյուս բնակավայրեր շարժերը, բայց իշխանության այդ բավական գեղեցիկ տեքստերն ու քարոզարշավը՝ ուղղված ասֆալտային քաղաքականությանը, անվտանգային սպառնալիքների, քաղաքական իմաստով որևէ խնդիր չեն լուծում ՀՀ քաղաքացիների համար։
Փաստացի Սյունիքի մեծ թվով բնակավայրերի մի հատվածի նկատմամբ Հայաստանը կորցնում է իր վերահսկողությունը, որովհետև ենթակառուցվածքայի առումով այդ վերահսկողությունն անցնում է Ադրբեջանին։ Այդ բնակավայրերը, որոնք տեղակայված են այդ հատվածում, ոչ միայն կապի առումով խնդիր ունեն, այլ նաև անվտանգային առումով խոշոր խնդիրներ են պարունակում։ Եվ եթե նույնիսկ որևէ փուլում այդ հատվածում այլընտրանքային ճանապարհներ ստեղծվեն, անվտանգային առումով խնդիրները մշտպես ակտուալ են մնալու»,- ընդգծեց Աբրահամյանը։
Պատգամավորի խոսքով՝ մենք չպետք է անընդհատ լինենք հետապնդվողի դերում, տեսնենք, թե Ադրբեջանն ինչ ճնշումներ է բանեցնում, ինչ տարածքային կորուստներ է պոկում, ու մենք սկսենք հարմարվել ստեղծված իրավիճակին։ «Այսպես շարունակվելուց հետո մի քանի տարի հետո մենք միասին խոսելու ենք Երևանի հարակից հատվածներում կամ մատույցներում ստեղծված իրավիճակի կամ ադրբեջանական անցակետերի մասին»,- նշեց Աբրահամյանը։
«Ադրբեջանը տեղեկայվում է Հայաստանի հետ շփման գծին այն հատվածներում, որոնք ունեն ռազմավարական նշանակություն։ Եվ հետագայում ցանկացած գործընթացում՝ կլինի դելիմիտացիա, դեմարկացիա, թե Հայաստանին ու Ադրբեջանին վերաբերող որևէ այլ գործընթաց, Ադրբեջանն ի սկզբանե իր համար ապահովում է Հայաստանի վրա ուժեղ ճնշումներ գործադրելու մեծ լծակներ։ Սա ենթադրում է, որ ցանկացած այլ իրավիճակում, նաև բանակցությունների սեղանի շուրջ Ադրբեջանը հանդես է գալու շատ ավելի ուժեղ դիրքերից։
Հայաստանն առաջիկայում սպասվող մեծ գործընթացներում՝ սկսած սահմանային դելմիտացիա-դեմարկացիա գործընթացից, վերջացրած Սյունիքի հետ կապված տարբեր հարցերով, միանգամից նեղացնում է իր բանակցային հնարավորությունները, ի սկզբանե Ադրբեջանին լեգիտիմ հնարավորություն և իրավունք է տալիս՝ Սյունիքի հատվածում վարվել այնպես, ինչպես վարվել է պատերազմից հետո»,- նշեց պատգամավորը:
Մանրամասները՝ տեսանյութում:
