09.06.2026 | 00:17
Մարկո Ռուբիոն շնորհավորել է Փաշինյանին
Եթե նոր որոշում չլինի, բուհերը նոյեմբերի 15-ից կանցնեն առկա ուսուցման
Հասարակություն
09.11.2021 | 14:09
Հաշվի առնելով ՀՀ-ում ստեղծված համաճարակային իրավիճակը՝ ԿԳՄՍ նախարարությունը բուհերի ռեկտորներին առաջարկել էր հոկտեմբերի 26-ից մինչև նոյեմբերի 15-ն ուսումնական գործընթացի կազմակերպումն իրականացնել առցանց տարբերակով: Նախարարությունը շրջաբերական գրություն էր ուղարկել նաև նախնական մասնագիտական (արհեստագործական) և միջին մասնագիտական ուսումնական հաստատությունների տնօրեններին:
ԿԳՄՍՆ մամուլի խոսնակ Գեղամ Մելիքբեկյանը Factor.am-ին հայտնեց, որ դեռևս չկա նոր որոշում, ըստ որի նոր շրջաբերական գրություն կուղարկվի բուհերին՝ հեռավար ուսուցումը երկարաձգելու առաջարկով։ Խոսնակը նաև ընդգծեց, որ բուհերի ռեկտորներն իրենք կարող են որոշել՝ նոյեմբերի 15-ից ինչ ձևաչափով կազմակերպել դասերը։
Հիշեցնենք, որ Առողջապահության նախարարությունն էր ԿԳՄՍ նախարարությանն առաջարկել կրթական հաստատություններին շրջաբերական գրություն ուղարկել՝ հեռավար ուսուցման անցնելու մասով։ Արդյո՞ք ԱՆ-ն այս առումով նոր որոշում ունի․ նախարարության մամուլի խոսնակ Հռիփսիմե Խաչատրյանը մեզ հայտնեց, որ դեռևս նոր որոշում չկա։
Ստացվում է, որ այս պահի տվյալներով՝ նոյեմբերի 15-ից բուհերը կանցնեն առկա ուսուցման։ Նշենք նաև, որ դպրոցական արձակուրդները ևս երկարաձգվել էին․ նոյեմբերի 8-ից դպրոցներն անցել են առկա ուսուցման տարբերակի։
Արփի Հակոբյան
