Միխայիլ Սաակաշվիլին հայտարարել է բանտում իրեն ծեծելու մասին

Վրաստանի նախկին նախագահ Միխայիլ Սաակաշվիլին հայտարարել է, որ բանտում իրեն ծեծել են ու մազերից բռնած՝ քարշ տվել։ Սաակաշվիլիի նամակը ճեպազրույցի ժամանակ կարդացել է նրա փաստաբան Նիկա Գվարամիան, հայտնում է Գրուզիա օնլայնը։

Նախօրեին Վրաստանի իշխանությունները հայտարարել էին, որ հացադուլ հայտարարած Սաակաշվիլիին Ռուսթավիի բանտից տեղափոխել են Գլդանիի բանտային հիվանդանոց։ Գվարամիան ասել է, որ դա տեղի է ունեցել խաբեությամբ. քաղաքական գործչին խոստացել են, որ նրան հոսպիտալացնելու են քաղաքացիական կլինիկա, ինչպես պահանջում են փաստաբաններն ու ընդդիմադիրները։

«Բանտի ներկայացուցիչներից մեկն ինձ ասաց՝ «Ծիտիկ, մենք քեզ բռնել ենք» ու հայհոյանքներ հնչեցրեց։ Ես հարցրեցի նրա անունն ու ազգանունը, սակայն ինձ չպատասխանեցին։ Այնուհետև, առանց զգուշացնելու, ինձ սկսեցին քաշքշելով դուրս հանել մեքենայից՝ չնայած իմ կտրուկ հրաժարմանը»,- ասված է Սաակաշվիլիի նամակում։

Քաղաքական գործիչը հայտարարել է, որ իրեն գետնին են գցել, մի քանի անգամ հարվածել են պարանոցին ու սկսել են քարշ տալ մազերից բռնած։

Նա բացատրել է, որ վնասել է բժշկական սարքավորումները, երբ տեսել է, թե ինչպես են պատրաստվում ինչ-որ ներարկում անել իրեն։ Սաակաշվիլին հրաժարվում է հաստատությունում ցանկացած բժշկական միջամտությունից և պահանջում է հանդիպում անձնական բժշկի հետ։ Վրաստանի նախկին նախագահի խոսքով՝ հիվանդանոց տեղափոխելու նպատակը ՌԴ նախագահ Վադիմիր Պուտինի հրամանով իր ֆիզիկական ոչնչացումն է։

«Ես չեմ ուզում թույլ տալ որևէ սադրանք, ինձ ստիպեցին ֆիզիկապես դիմադրել բռնությանը, բայց ես այստեղ մենակ եմ, իսկ դուք շատ եք, հետևաբար, ոչ ոք չի կարող ձեզ հաղթել»,- իր ուղերձում հավելել է քաղաքական գործիչը։

Տաթև Ֆռանգյան