29.06.2026 | 14:53
Գալուզինը պնդում է, թե ԵՄ-ին Հայաստանի անդամակցության գործընթացը սկսվել է
Էրդողանը Սիրիայում ռազմական նոր գործողություն է սկսում՝ ընտրություններից առաջ հանրային աջակցությունը մեծացնելու համար․ Թուրքիայի նախկին ԱԳ նախարար
Քաղաքականություն
08.11.2021 | 20:42
Թուրքիայի կառավարությունը Սիրիայում ցանկանում է նոր ռազմական գործողություններ սկսել՝ ընտրություններից առաջ հանրային աջակցության նվազման պատճառով։ Նման կարծիք է հայտնել Թուրքիայի նախկին ԱԳ նախարար Յաշար Յաքըշը, գրում է «Ահվալ» գործակալությունը։
Յաքըշը Arab News-ում գրել է, որ ռազմական ներխուժումներն ինչքան էլ սխալ լինեն, նպատակ ունեն ազգայնական ընտրողների շրջանում մեծացնել կառավարության աջակցությունը 2023 թվականի ընտրություններին ընդառաջ։
«Կառավարությունները երբեմն որոշումներ են ընդունում, որոնք կարող են նպաստել նրանց քաղաքական գոյատևմանը, որոնք, սակայն, դեմ են իրենց ժողովուրդների ազգային շահերին»,- ասել է նախկին ԱԳ նախարարը։
Թուրքիան 2016 թվականից հետո անդրսահմանային երեք օպերացիա է իրականացրել Սիրիայում։ Թուրքիան և թուրքամետ սիրիացի զինյալները վերահսկում են երեք տարբեր տարածքներ ընդհանուր սահմանի մոտ՝ հյուսիս-արևմտյան Աֆրինը, Իդլիբը, Ռաս ալ-Այնը։
Ըստ Յաքըշի՝ Թուրքիան հիմա երեք այլ տարածքներ է դիտարկում՝ Մանբիջը, Թել Ռիֆաթը և ավելի տարածքներ Եփրատի արևելքում։
Դիվանագետը նաև նշում է, որ չնայած կառավարությունը պատրաստվում է հնարավոր ռազմական գործողության՝ կան նաև պատճառներ՝ հավատալու, որ այդ գործողությունները մոտ ապագայում չեն լինի՝ հաշվի առնելով Թուրքիայի հարափոփոխ հարաբերությունները ԱՄՆ-ի հետ և սիրիական կառավարության վերաբերմունքը։
Նշենք, որ Յաքըշը 2002-2003 թվականներին զբաղեցրել է Թուրքիայի ԱԳ նախարարի պաշտոնը։ Նա Թուրքիայի նախագահ Ռեջեփ Թայիփ էրդողանի «Արդարություն ու զարգացում» կուսակցության հիմնադիրներից է։
Էմմա Չոբանյան
