19.11.2024 | 16:33
Հովիկ Աղազարյանը հրավիրվել է Հակակոռուպցիոն կոմիտե
Բաքուն խնայողաբար է ծախսում Արցախի գրավյալ տարածքների վերականգնման համար նախատեսված միջոցները․ հատկացված գումարի միայն 43%-ն է ծախսվել
Քաղաքականություն
05.11.2021 | 22:53
Ադրբեջանը Արցախի գրավյալ տարածքների վերականգնման համար այս տարվա հունվար-սեպտեմբեր ամիսներին ծախսել է 955․2 մլն մանաթ (561 մլն դոլար), հայտնում են ադրբեջանական լրատվամիջոցները։
««Մեծ վերադարձի» ապահովման համար Ղարաբաղում քաղաքների ու գյուղերի վերակառուցման և վերականգնման համար 2021թ․ հունվար-սեպտեմբեր ամիսներին Ադրբեջանի բյուջեից ուղղվել է 955․2 մլն մանաթ։ Այն կազմում է այս տարի նշյալ նպատակների համար նախատեսված պետական ներդրումների 43․4 տոկոսը»,- ասվում է Ադրբեջանի խորհրդարան ներկայացված 2022թ․ պետբյուջեի նյութերում։
Նշվում է, որ այդ միջոցներից 803 մլն մանաթ (472 մլն դոլար) ուղղվել է ավտոճանապարհների նախագծմանն ու շինարարությանը, 44․8 մլն մանաթ (26․3 մլն դոլար)՝ ականազերծմանը, իսկ մնացյալ գումարը՝ այլ նախագծերի իրականացմանը։
Հավելենք, որ այս տարի Ադրբեջանը պետբյուջեից 2․2 մլրդ մանաթ (1 մլրդ 294 մլն դոլար) է հատկացրել Արցախի գրավյալ տարածքների վերականգնմանը։ Ստացվում է, որ հատկացված միջոցների կեսն էլ դեռևս չի ծախսվել։ Գումարները ծախսվում են խնայողաբար։ Չի բացառվում, որ դրա պատճառը նաև միջոցների սղությունն է։ Չնայած Ադրբեջանի նախագահն ու պաշտոնյաները հայտարարում են, որ բավարար ֆինանսական միջոցներ ունեն, այնուամենայնիվ, շարունակում են փորձել տարբեր երկրներից, միջազգային կառուցներից գումար ներգրավել Արցախի գրավյալ տարածքների վերականգնմանը։
Ամենածախսատար նախագիծը, որ այժմ իրականացվում է, 3 օդանավակայանների կառուցումն է։ Ի դեպ, Վարանդայի օդանավակայանի կառուցման համար, որի բացումը տեղի ունեցավ Ադրբեջանի ու Թուրքիայի նախագահների մասնակցությամբ հոկտեմբերի 26-ին, չի նշվում, թե որքան գումար է ծախսվել։
Նախատեսվում է նաև ևս 2 օդանավակայան կառուցել՝ Կովսականում ու Քաշաթաղում։
Հավելենք, որ Ադրբեջանի կառավարությունը ծրագրում է 2022 թվականին Արցախի գրավյալ տարածքների վերականգնման համար պետական բյուջեից հատկացնել 2․2 մլրդ մանաթ (շուրջ 1․3 մլրդ դոլար)։
Էմմա Չոբանյան
