25.04.2026 | 12:11
Ֆրանսիան միշտ կլինի Հայաստանի կողքին. Լըկոռնյու
Չավուշօղլուն հայտարարել է, որ ԼՂ հարցով ակտիվ շփում կա ՌԴ-ի հետ ու նշել՝ Անկարան պատրաստ է կարգավորել Երևանի հետ հարաբերությունները
Քաղաքականություն
04.11.2021 | 19:44
Թուրքիան ակտիվորեն շփվում է Ռուսաստանի հետ մի շարք արդիական հարցերի, այդ թվում՝ Սիրիայում, Լիբիայում ու Ղարաբաղում իրավիճակի շուրջ։ Տարաձայնություններ դիրքորոշումներում կան, սակայն կողմերը հավատարիմ են մնում կառուցողական երկխոսությանը՝ ազգային շահերից բխող զգայուն հարցերի փոխադարձ դիտարկմամբ։ Այս մասին հայտարարել է Թուրքիայի ԱԳ նախարար Մևլութ Չավուշօղլուն Անկարայում խորհրդարանական հանձնաժողովի նիստում, գրում է «Անադոլու» գործակալությունը։
Նա, մասնավորապես, ընդգծել է, որ Թուրքիան չի ճանաչել ու չի ճանաչի «Ղրիմի անօրինական բռնակցումը և կշարունակի հետևել Ղրիմի թաթարների անվտանգության ու բարեկեցության խնդրին»։
Խոսելով Հարավային Կովկասի մասին՝ Չավուշօղլուն նշել է, որ այս տարածաշրջանում փոփոխությունների ու վերափոխումների հույս կա։
«Ադրբեջանի «օկուպացված տարածքների ազատագրմամբ» տարածաշրջանը երկարաժամկետ խաղաղության պատմական հնարավորություն է ստացել»,- ասել է թուրք պաշտոնյան՝ նշելով, որ Անկարան պատրաստ է Երևանի հետ հարաբերությունների կարգավորման գործընթացին։
«Մենք հուսով ենք, որ Հայաստանը կօգտագործի տարածաշրջանում խաղաղության ու զարգացման այս հնարավորությունը»,- ասել է Չավուշօղլուն։
Նա նաև ասել է, որ թուրքական դիվանագիտության առաջնահերթություններից է Կենտրոնական Ասիայի երկրների հետ համագործակցությունը։
«Մենք նաև նպատակ ունենք մեծացնելու Թյուրքական խորհրդի նշանակությունը՝ որպես միջազգային կազմակերպության։ Սեպտեմբերի վերջին Ստամբուլում Թուրքիայի ԱԳՆ-ի կազմակերպչական աջակցությամբ կայացել է թյուրքալեզու պետությունների դիվանագիտության ղեկավարների հանդիպումը, իսկ նոյեմբերի 12-ին նախատեսվում է կազմակերպության ղեկավարների գագաթնաժողովը, որի ընթացքում նախագահությունն անցնելու է Թուրքիային»,- ասել է Մևլութ Չավուշօղլուն։
Էմմա Չոբանյան
