38 հազար ուսուցչից ընդամենը 1000-ն է մասնակցել կամավոր ատեստավորմանը. ինչո՞ւ է կեսից պակասը հաղթահարել շեմը․ ՏԵՍԱՆՅՈւԹ

Կամավոր ատեստավորման գործընթացին մասնակցած 996 ուսուցչից միայն 468-ն է գիտելիքների ստուգման արդյունքում հաղթահարել անցողիկ շեմն ու արժանացել հավելավճարի. դա կազմում է մասնակիցների շուրջ 47 տոկոսը: Այսինքն՝ հանրապետության շուրջ 38 հազար ուսուցչից կամավոր ատեստավորմանը մասնակցել է ընդամենը 2.5 տոկոսը՝ շուրջ 1000 ուսուցիչ։

Կրթության փորձագետ Սերոբ Խաչատրյանը հիշեցնում է՝ ԿԳՄՍ նախարարությունը կանխատեսել էր, որ ատեստավորման համար կգրանցվի 2000-ից ավելի ուսուցիչ, մինչդեռ ժամկետը երկարացնելուց հետո անգամ դիմել է 1300-ից մի փոքր ավելին․ նրանց 30 տոկոսն առհասարակ չի ներկայացել: Սա, ըստ փորձագետի, մեծ խնդիր է:

Երևանի թիվ 166 հիմնական դպրոցի հայոց լեզվի ուսուցչուհի Լիլիթ Կոստանդյանը, որը մասնակցել է կամավոր ատեստավորման գործընթացին և հաղթահարել անցողիկ շեմը, վստահ է՝ եթե դպրոցների տնօրենները և, առհասարակ, շրջապատը ուսուցիչներին գոտեպնդեին, ինչպես իր պարագայում է եղել, մասնակիցների թիվն անհամեմատ բարձր կլիներ:

Երևանի թիվ 114 ավագ դպրոցի ուսուցչուհի Թամարա Օհանյանն էլ, որը չի մասնակցել կամավոր ատեստավորման գործընթացին, այն համոզման է, որ պատժի հնարավոր մեխանիզմները դրդում են ուսուցիչներին հապաղել ատեստավորմանը մասնակցելու հարցում:

Սերոբ Խաչատրյանի համոզմամբ՝ կան բազմաթիվ ունակություններ և հմտություններ, որոնք թեստով չափել հնարավոր չէ, և կան վաստակաշատ ուսուցիչներ, որոնք տարիքով պայմանավորված գործոնների պատճառով չեն կարող մրցել, օրինակ, երիտասարդների հետ, բայց դա չի նշանակում, թե նրանք վատ ուսուցիչներ են: Իսկ այդ ուսուցիչներին պատժելու մասին, ըստ փորձագետի, խոսք անգամ չպետք է լինի:

Կամավոր ատեստավորման այս փուլին մասնակցել են 7-12-րդ դասարաններում դասավանդող ուսուցիչներ հետևյալ առարկաների գծով․ հայոց լեզու և գրականություն, հայոց պատմություն, հանրահաշիվ, երկրաչափություն, ֆիզիկա, քիմիա, կենսաբանություն և աշխարհագրություն:

Ըստ առարկաների՝ ամենաբարձր ցուցանիշը գրանցվել է մաթեմատիկա, ֆիզիկա, հայոց լեզու առարկաներից, իսկ ամենացածր ցուցանիշը՝ քիմիա և աշխարհագրություն առարկաներից:

Սերոբ Խաչատրյանը նկատում է, որ, օրինակ, մաթեմատիկա, ֆիզիկա առարկաների գծով դրական արդյունք գրանցելու պատճառներից մեկն այն է, որ դեռ խորհրդային տարիներից այդ առարկաները խորքային կերպով ուսումնասիրվել են:

Լիլիթ Կոստանդյանն էլ, խոսելով թեստերի թերություններից, շեշտում է՝ դրանց ծավալը բավական մեծ է, իսկ երեք ժամը կոնկրետ հայոց լեզվի համար՝ քիչ, այն հազիվ բավարարում է կարդալու և նշումներ կատարելու համար, իսկ հարցին վերադառնալու համար ժամանակ պարզապես չի մնում:

Ի դեպ, Կառավարության նիստի ընթացքում ԿԳՄՍ նախարար Վահրամ Դումանյանն անդրադարձավ նաև թեստերի թերի կողմերին, իսկ վարչապետ Նիկոլ Փաշինյանը խոսեց ատեստավորման շեմը չհաղթահարած ուսուցիչների հետագա հնարավորությունների մասին:

Հայաստանում ուսուցչի միջին աշխատավարձը շուրջ 125 հազար դրամ է. Այսպիսով, 30 տոկոս հավելավճարի դեպքում, ուսուցչի աշխատավարձը կբարձրանա շուրջ 37 հազար դրամով, 40 տոկոսի դեպքում՝ 50 հազար, 50 տոկոսի դեպքում՝ 61500 դրամով: Արդեն հաջորդ տարվանից գործընթացին կմասնակցեն 5-12-րդ դասարաններում դասավանդող ուսուցիչները՝ բոլոր առարկաների գծով:

Մանրամասները՝ տեսանյութում:

Աննա Բաբաջանյան