«Վարձի օրերը գալիս են, ես չեմ տեղավորվում, պետք է աշխատեմ»․ արցախցի կինն անգործ է մնացել. ՏԵՍԱՆՅՈՒԹ

53-ամյա Նարինե Մոսիյանը մասնագիտությամբ հաշվատար օպերատոր  է։ Աշխատել է Ստեփանակերտի քաղաքապետարանում, ԼՂ անվտանգության խորհրդի աշխատակազմում, Պաշտպանության բանակում, սակայն հիմա անգործ է մնացել։ 

Նարինեն աղջկա, փեսայի ու թոռների հետ 2023-ին բռնի տեղահանվել է Արցախից։ Ամուսնուն կորցրել է տարիներ առաջ, եղբայրն էլ զոհվել է 2016 թվականի Ապրիլյան պատերազմի ժամանակ, իսկ մայրը մահացել է շրջափակման ժամանակ։ Այսօր փորձում է ուժ գտնել՝ կյանքը նոր պայմաններում շարունակելու համար։

Այս տուն վերջերս է տեղափոխվել։ Սպասքի մի մասը հետը բերել է Արցախից։ Սուրճ պատրաստելիս մտքով կրկին վերադառնում է Ստեփանակերտ, հարազատ տան առօրյան, ծանոթ փողոցներն ու անցած օրերն են աչքի առաջ գալիս։

Մեկ ամիս առաջ է ստիպված թողել աշխատանքը, ասում է՝ աշխատավայրն իր բնակության վայրից բավական հեռու էր, ստիպված էր ժամերով ճանապարհներին անցկացնել։ Հույս է ունեցել, որ կկարողանա շուտ նոր աշխատանք գտնել, իսկ մինչ այդ էլ գոյատևել պետության կողմից տրամադրվող «40+10» ծրագրի օգնությամբ։ Նարինեն նշում է՝ երկու օր առաջ է ստացել սոցաջակցության վերջին գումարը, քանի որ Կառավարությունը որոշել է ապրիլի 1-ից դադարեցնել բնակվարձերի համար տրամադրվող «40+10» ծրագիրը, ինչն արցախցիների շրջանում դժգոհությունների է առաջացրել և բողոքի ակցիաների առիթ տվել։

Այս դժգոհությունների ֆոնին Կառավարությունն այսօր որոշեց ցածր եկամուտներ ունեցող շուրջ 3000 ընտանիքների կյանքի դժվարին իրավիճակը հաղթահարելու համար լրացուցիչ հրատապ սոցիալական աջակցություն տրամադրել ապրիլից մինչև դեկտեմբեր։ Արդյո՞ք Նարինեն կմտնի այդ խմբի մեջ և կշարունակի աջակցություն ստանալ, դեռ պարզ չէ։

Մանրամասները` տեսանյութում։

Անի Թամրազյան