Տարածաշրջանում Իրանի համար մեկ հավատարիմ գործընկեր է մնացել՝ Հայաստանը․ երկուսն էլ դա պետք է ընկալեն․ Արմեն Պետրոսյան․ ՏԵՍԱՆՅՈՒԹ

Բաքուն բաց թողեց իրանցի վարորդներին, դրանից առաջ էլ եղավ իրանական կողմի հայտարարությունը։ Այս և հարակից թեմաների մասին Factor TV-ն զրուցել է տարածաշրջանի հարցերով փորձագետ Արմեն Պետրոսյանի հետ։

-Պարո՛ն Պետրոսյան, իրանական և ադրբեջանա-թուրքական զորավարժություններից հետո կարծես թե լարվածությունը հասավ գագաթնակետին և նվազում էր։ Հիմա, երբ վարորդներին արդեն բաց են թողել, արդյո՞ք համարենք, որ թեման փակվեց։

-Մեծ հաշվով, բնականաբար, չենք կարող ասել, որ թեման փակվել է, որովհետև այս վերջին լարվածությունն ընդամենը բավականաչափ երկար շղթայի մի օղակն է, որն ըստ էության սկսվել էր հետպատերազմյան շրջանում, երբ մեր տարածաշրջանում հաստատվեց ուժային նոր բալանս։ Եվ Իրանը կորցնողի դիրքում էր։ Կարծես թե կողմերը «կարմիր գծեր» են հատել, և այլևս հետդարձ, նախկին, թեկուզ թեական կամ երևակայական հարևանային, դրացիական հարաբերություններին վերադարձ չի լինելու, հստակ լինելու է մրցակցություն։

Այս տարածաշրջանում մեկ հավատարիմ և կարևոր գործընկեր է մնացել Իրանի համար, և դա Հայաստանն է։ Ե՛վ Իրանում, կարծում եմ, և՛ Հայաստանում պետք է հաշվի առնեն դա։

-Ասացիք, որ «կարմիր գծեր» են հատվել։ Հայաստանը շահե՞ց, թե՞ տուժեց այս ամենից։

-Հայաստանը պետք է, նախ և առաջ, ուշի ուշով հետևի բոլոր գործընթացներին, որովհետև պատերազմից հետո երկու դերակատար, ամեն մեկը՝ իր դիրքում, զիջեց։ Մեկը Հայաստանն էր՝ պարտվելով պատերազմում, մեկն էլ Իրանն է, որ դուրս մղվեց տարածաշրջանային գործընթացներից։ Հիմա այս երկու դերակատարներն էլ ունեն միևնույն նպատակները՝ վերականգնել իրենց դիրքերը։ Հետևաբար, այստեղ բացվում է աշխատանքի բավականաչափ լայն և խաչվող դաշտ ու համագործակցություն՝ կորցրած դիրքերը վերադարձնելու։

-Հակասություններ չկա՞ն երկու դիրքերում։

-Իհարկե՝ կլինեն հակասություններ, միանշանակ է, որովհետև մենք պետք է հաշվի առնենք բոլոր այն խնդիրները, որ կապված են Իրանի հետ, հատկապես՝ Իրան-Արևմուտք հարաբերությունների մասով, որտեղ Հայաստանի խաղի շրջանակը որոշակիորեն սահմանափակվում է։ Մենք պետք է հաշվի առնենք Իրան-Իսրայել հակամարտությունը։ Մենք պետք է հաշվի առնենք զուգահեռաբար նաև Ռուսաստանի դիրքորոշումը, որը, չնայած հրապարակային դրական դիրքորոշում ունի Իրանի հանդեպ, բայց Իրանը դիտարկում է որպես մրցակից և՛ տարածաշրջանում, և՛ Հայաստանում։

Հարցազրույցն ամբողջությամբ՝ տեսանյութում։

Գարիկ Հարությունյան