Ինչ համաձայնություն է ստացել Ալիևը. նա պատրաստ է հանդիպել Փաշինյանի հետ. ՏԵՍԱՆՅՈւԹ

Փաշինյանն ու Ալիևը վերստին հաստատել են միմյանց հանդիպելու պատրաստակամությունը: Հայաստանի վարչապետը հոկտեմբերի 4-ին Լիտվայում հայ համայնքի ներկայացուցիչների հետ հանդիպման ընթացքում Ալիևին առաջարկել է Բաքվում պահվող հայ ռազմագերիներին փոխանակել ականապատված տարածքների քարտեզների հետ:

«Ես պատրաստ եմ մեր ունեցած բոլոր քարտեզներն ինձ հետ տանել և Ադրբեջանի նախագահին կոչ եմ անում իր հետ բերել մեր բոլոր գերիներին: Խոսքն այն քարտեզների մասին է, որոնք Հայաստանի և Ադրբեջանի զինված ուժերին իրարից չեն բաժանում, այսինքն՝ դրանք ռազմական գործնական անվտանգային նշանակություն չունեն, այլ ունեն միայն հումանիտար նշանակություն, որովհետև գտնվում են Ադրբեջանի զինված ուժերի թիկունքում»,- ասել է Փաշինյանը:

Փաշինյանի հանդիպման առաջարկը չմերժելով՝ Ադրբեջանի նախագահը հայտարարել է, թե այսպիսով հայկական կողմն ընդունում է Բաքվի օրակարգը:

«Նիկոլ Փաշինյանը ևս ասաց, որ պատրաստ է: Ի՞նչ է սա նշանակում: Սա ցույց է տալիս, որ մեր օրակարգն արդեն ընդունվում է: Ոմանք կարող են անհանգստանալ այս կապակցությամբ: Սակայն գլխավորն այն է, որ Ադրբեջանի և Հայաստանի միջև լինի հաշտություն, այսինքն՝ խաղաղության պայմանագիր ստորագրվի: Մենք սա ենք ուզում»,- նշել է Ալիևը:

Պաշտոնական Բաքուն պատերազմից հետո հստակեցնելով իր օրակարգը՝ հայտարարում է երկու հիմնական կետերի մասին: Մասնավորապես, խոսքը, ըստ Ալիևի, այն մասին է, որ Արցախի խնդիր չկա, այն լուծված է և Ադրբեջանը Նախիջևանի հետ կապ հաստատելու միջանցք է ստանում Մեղրիով: Հայկական կողմի համար այս կետերը սկզբունքորեն մերժելի են, և այդ դեպքում ինչպե՞ս կարելի է մեկնաբանել այն, երբ Ալիևը հայտարարում է, որ Բաքվի օրակարգը հայկական կողմն ընդունում է:

ԱԺ պաշտպանության և անվտանգության հարցերի մշտական հանձնաժողովի նախագահ, Փաշինյանի թիմակից Անդրանիկ Քոչարյանը նշում է՝ Երևանի համար ընդունելի չի կարող լինել միջանցքի վերաբերյալ որևէ օրակարգ: Այնուհանդերձ, իշխանական պատգամավորը տեղեկություններ չունի, թե երբ տեղի կունենա Փաշինյան-Ալիև հանդիպումը:

Ընդդիմադիր «Պատիվ ունեմ» խմբակցության քարտուղար Հայկ Մամիջանյանը նկատում է՝ պաշտոնական Երևանը չի հերքել Ալիևի այն ձևակերպումները, որ հայկական կողմն ընդունում է Բաքվի օրակարգը: Ընդդիմադիր պատգամավորը, սակայն, հույս ունի, որ բանակցությունների արդյունքում կպահպանվի ԵԱՀԿ ՄԽ ձևաչափը:

Քաղաքագետ Անդրիաս Ղուկասյանը Ալիևի այս հայտարարությունը որակում է որպես ինքնապաշտպանական: Ասում է՝ 2022 թվականին Եվրոպայի խորհրդի կողմից Ադրբեջանը ճանաչվելու է ագրեսոր, ինչի համար էլ փորձում է Հայաստանի հետ կառուցողական հարաբերություններ ստեղծել:

Խոսելով Փաշինյան-Ալիև հնարավոր հանդիպման մասին՝ քաղաքագետը կարծիք հայտնեց, որ այն չի տալու ցանկալի արդյունք:

Ի վերջո՝ երբ տեղի կունենա Փաշինյան-Ալիև հանդիպումը, հստակություն չկա: Սակայն հայտնի է, որ մոտ ապագայում Փաշինյանը Մոսկվայում հանդիպում է ունենալու Պուտինի հետ: Օրակարգի կարևոր հարցերն են Ղարաբաղյան հիմնախնդիրն ու հայ-ռուսական հարաբերությունները:

Մանրամասները՝ տեսանյութում։

Նարեկ Կիրակոսյան