Քոչարյանը խոստովանական ցուցմունք տվեց․ նա անելիք չունի ՀՀ-ում՝ իբրև քաղաքական գործիչ․ Ռուբեն Մեհրաբյան․ ՏԵՍԱՆՅՈւԹ

Factor TV-ի զրուցակիցը «Հանուն Հանրապետության» կուսակցության փոխնախագահ Ռուբեն Մեհրաբյանն է

-Պարո՛ն Մեհրաբյան, մեր զրույցի առաջին հարցը չէր լինի Ռոբերտ Քոչարյանի ասուլիսին առնչվող, եթե նա, օրինակ, միանշանակ պատասխան տար Factor TV-ի հարցին՝ քննարկելի՞ է, արդյոք, ՌԴ-ի հետ Միութենական պետություն ստեղծելու գաղափարը, թե՞ ՀՀ անկախությունն իր համար բացարձակ, անսակարկելի արժեք է։ «Այն, ինչ տեսնում եմ հիմա, հարցեր է առաջացնում: Այս տեմպերով արդյո՞ք մենք ունենք բավարար ռեսուրսներ պետականաշինության համար: Անվտանգության տեսանկյունից իմ տպավորությունն այնպիսին է, որ մենք, միգուցե, ավելի մեծ միավորում տեղավորվելու կարիք ունենք»,- պատասխանել է Քոչարյանը։ Ո՞րն է Ձեր մեկնաբանությունը, ինչպե՞ս կարող է նախկին նախագահի համար անկախությունը բացարձակ արժեք չլինել՝ նա չի շեշտում դա։

-Ես կարծում եմ՝ Ռոբերտ Քոչարյանի այդ ինքնախոստովանությունն ավելի պերճախոս է, քան ցանկացած մեկնաբանություն։

-Բայց հարցը մանրամասների կարիք ունի՝ ինչո՞ւ է արվում այդ հայտարարությունը։

-Դա նշանակում է, որ Ռոբերտ Քոչարյանը, իր նմաններն անելիք չունեն ՀՀ-ում որպես քաղաքական գործիչներ։ Նրանք ավելի լավ է ծամոն ծամեն, քան խոսեն։ Քաղաքականությունն այն գործունեության ոլորտն է, որից նրանք գլուխ չեն հանում։ Նրանց զբաղվելն այդ ոլորտում միայն վնաս է բերում, որովհետև ահա սա՛ է այդ մարդկանց մտածողությունը։ Հետևապես, այդ մարդիկ անելիք չունեն մեր քաղաքացիների, մեր պետության քաղաքական օրակարգի համատեքստում, և կարծում եմ՝ սրանից հանրությունը շատ ուղիղ եզրակացություններ ունի անելու։

-Եթե Քոչարյանն ու նրա թիմն անելիք չունեն․․․ եկեք հիշենք նրանց հավաքած քվեների տոկոսներն ընտրություններում։ Իհարկե, այդ ուժի կողմից ընտրակեղծիքներ կատարելու փաստերով քրեական գործեր կան, և եթե չեմ սխալվում՝ որոշ գործեր դատարաններ են ուղարկվել։ Ի՞նչ է սա վկայում։

-Գիտեք՝ ինչ, պետականությունը մերժող այդ քաղաքական խմբակը և այդ օրբիտայի շուրջը պտտվող այդ «յալանչիներն» ի վերջո, այո՛, կարող են մարդկանց թյուրիմացության մեջ գցել, մանավանդ՝ հետպատերազմական ծանր հոգեբանական շրջանում։ Արդյունքում ստացել ենք ստոպ-կադրով պատկեր, և որի հետ ստիպված ենք առավելագույնը հինգ տարի գոյակցել։

Հարցազրույցն ամբողջությամբ՝ տեսանյութում։

Ռոբերտ Անանյան