24.05.2026 | 22:03
«Ազգային-ժողովրդավարական բևեռ»-ը քարոզարշավ է իրականացրել Արարատի մարզում
Ի՞նչ միջոցներով է Երևանի քաղաքապետարանը 20 հազար դրամներ բաժանել կանանց
Հասարակություն
09.03.2018 | 13:43
Երևանի քաղաքապետարանի աշխատակազմի և ավագանու կին անդամների համար 20 հազար դրամներով նվեր քարտերը ձեռք են բերվել «Երևան» հիմնադրամի միջոցներից: Այս մասին Factor.am-ին տեղեկացրեց Երևանի քաղաքապետարանի աշխատակազմի տեղեկատվության և հասարակայնության հետ կապերի վարչության պետ Արթուր Գևորգյանը:
Factor.am-ն ավելի վաղ գրել էր, որ քաղաքապետ Տարոն Մարգարյանը Մարտի 8-ին ընդառաջ քաղաքապետարանի կին անդամներին բացիկներ և բանկային քարտեր է նվիրել: Այդ առնչությամբ Երևանի ավագանու «Ելք» խմբակցության անդամ Զարուհի Բաթոյանը գրառում էր կատարել ֆեյսբուքյան իր էջում՝ նշելով, որ քաղաքապետի կողմից ավագանու անդամին գումար կամ թանկարժեք այլ իր նվիրելն էթիկապես ճիշտ չէ: Բաթոյանն առաջարկել էր քաղաքապետին հաջորդ տարի բավարարվել միայն բացիկներ նվիրելով:
Նշենք, որ Երևանի քաղաքապետարանն ունի մոտ 2000 աշխատակից: Թե նրանցից քանիսն են կանայք, Factor.am-ը հետաքրքրվեց քաղաքապետարանի աշխատակազմի տեղեկատվության և հասարակայնության հետ կապերի վարչության պետից, որը սակայն, դժվարացավ պատասխանել: Արթուր Գևորգյանը նաև տեղյակ չէր, թե քանի նվեր քարտ է գնվել Մարտի 8-ին ընդառաջ: Պաշտոնյան հորդորեց զանգահարել աշխատանքային օրերին:
Նշենք, որ բացի 20 հազարական դրամներ նվիրելուց, քաղաքապետարանում տոնին ընդառաջ նաև համերգ է կազմակերպվել, կանանց բաժանվել են ծաղկիկներ: Թե ընդհանուր առմամբ ինչքան գումար է ծախսել Երևանի քաղաքապետարանը Մարտի 8-ը նշելու համար, Factor.am-ը կանդրադառնա աշխատանքային օրերին:
Շողիկ Գալստյան
