Քաղաքականություն
08.07.2021 | 19:09
Եվրահանձնաժողովը գերմանական երկու խոշորագույն ավտոարտադրողներին՝ Volkswagen-ին և BMW-ին տուգանել է ավելի քան 875 միլիոն եվրոյով։ Եվրոպացի պաշտոնյաների խոսքով՝ ավտոարտադրողներն ապօրինի դավադրության մեջ են մտել դիզելային մեքենաների արտանետումների մաքրման տեխնոլոգիաների ոլորտում մրցակցությունը սահմանափակելու համար, գրում է Euronews-ը:
Volkswagen ընկերությունների խումբը, որում ներառված են Volkswagen-ն, Porsche-ն ու Audi-ն, համաձայնել են վճարել 502,362,000 եվրո, իսկ BMW-ն՝ 372,827,000 եվրո:
Նախագծի մաս կազմող Daimler-ը ստացել է լիակատար անձեռնմխելիություն և ազատվել տուգանքներից, քանի որ այն Բրյուսելին տեղեկացրել է գաղտնի պայմանավորվածության գոյության մասին: Ընկերությանը կարող էր սպառնալ 727 միլիոն եվրո տուգանք, եթե բացահայտումներով չներկայանար:
Բրյուսելը պարզել է, որ բազմազգ ընկերությունները միասին աշխատել են ավելի քան հինգ տարի (2009-ի հունիսից մինչև 2014-ի հոկտեմբեր)՝ ԵՄ միասնական շուկայում արդար մրցակցությունից խուսափելու համար: Նշվում է, որ ընկերությունները «կանոնավոր տեխնիկական հանդիպումներ» են անցկացրել՝ քննարկելու դիզելային ավտոմեքենաներից ազոտի օքսիդի վնասակար արտանետումները վերացնող նոր տեխնոլոգիաների զարգացումը:
Տաթև Ֆռանգյան
