ԿԽՄԿ-ն կշարունակի Հայաստանի և Ադրբեջանի միջև ռազմագերիների փոխանակման աշխատանքը

Կարմիր խաչի միջազգային կոմիտեն (ԿԽՄԿ) կշարունակի Լեռնային Ղարաբաղում ռազմական գործողություններից հետո Հայաստանի և Ադրբեջանի միջև ռազմագերիների փոխանակման աշխատանքը, սակայն ռազմագերիների կարգավիճակի հարցը պետք է կողմերն իրենք որոշեն։ Այս մասին «Իզվեստիային» ասել է կազմակերպության նախագահ Փեթեր Մաուրերը։

«Այո՛, Կարմիր խաչն անմիջական հասանելիություն ունի ձերբակալվածներին։ Մենք կարող ենք կիսվել մեր փորձով, կարող ենք խորհուրդ տալ, սակայն համապատասխան կառավարությունները պետք է որոշեն և ինքնուրույն վերջնական գնահատական տան կարգավիճակին։ Մենք կապի մեջ ենք երկու կողմի հետ, և հուսով ենք, որ ապագայում կհաջողվի լուծում գտնել բոլոր պահվող անձանց համար, որոնք գտնվում են Հայաստանում ու Ադրբեջանում»,- ընդգծել է Մաուրերը՝ պատասխանելով ռազմագերիներին այցելելու մասին հարցին։

ԿԽՄԿ ղեկավարը նշել է, որ կազմակերպության ներկայացուցիչներն այցելել են ձերբակալվածներին, բայց կազմակերպությունը չի տալիս նրանց պահման պայմանների վերաբերյալ հանրային գնահատական տալ:

«Մենք այցելում ենք, որպեսզի գնահատենք մարդկանց պահման պայմանները, բայց, ինչպես գիտեք, սա ԿԽՄԿ-ի համար գաղտնի գործընթաց է»,- բացատրել է Մաուրերը՝ հավելելով, որ ԿԽՄԿ-ն աշխատում է տարածաշրջանի իշխանությունների հետ:

Փեթեր Մաուրերը նաև ընդգծել է, որ այս տարի Կարմիր խաչը 5 անգամ կմեծացնի իր առաքելության ֆինանսավորումը Լեռնային Ղարաբաղում՝ հասցնելով մինչև 50 միլիոն եվրոյի։

Հիշեցնենք՝ Հադրութի Հին Թաղեր ու Խծաբերդ բնակավայրերում դեկտեմբերին, ռազմական գործողությունների ավարտից հետո, Շիրակի մարզի տարբեր համայնքներից 62 զինծառայողներ գերեվարվեցին Ադրբեջանի կողմից։ 9 շիրակցիներ արդեն վերադարձել են․ հունվարի 28-ին Հայաստան վերադարձավ 5 շիրակցի գերի, փետրվարի 8-ին՝ ևս 5 գերի, որոնցից 3-ը՝ Գյումրիից։ Եվս մի խումբ՝ 3 ռազմագերի, Հայաստան վերադարձավ մայիսի 4-ին․ նրանցից մեկը Շիրակի մարզից է։ Հունիսի 12-ին էլ Ադրբեջանը Հայաստանին վերադարձրեց 15 ռազմագերու, որոնց մեջ շիրակցիներ չկային։

Տաթև Ֆռանգյան