Քաղաքականություն
17.06.2021 | 12:15
Ադրբեջանցիների՝ Արցախի գրավյալ տարածքներում ականի վրա պայթելու հերթական դեպքն է գրանցվել։ Տեղական լրատվամիջոցների հաղորդմամբ՝ հայտնի է դարձել, որ 10 օր առաջ Աղդամում կորած տղամարդը պայթել է ականի վրա։
Անհետ կորած Ջասարաթ Խաթամանովը ականի վրա պայթելու հետևանքով մահացել է Սեիդլի գյուղում։
Նշվում է, որ Խաթամանովն աշխատել է Գուզանլիում գերեզմանաքարերի արտադրամասում՝ որպես վարորդ։ Հերթական անգամ աշխատանքի գնալուց հետո նրա հետ կապը կորել է։ Ոստիկանությունում ահազանգ է հնչել այդ կապակցությամբ, նրան սկսել են փնտրել Արցախի գրավյալ տարածքներում։
Նշենք, որ ականի վրա պայթելու հետևանքով մինչ օրս 140-ից ավելի ադրբեջանցի է տուժել։ Մասնավորապես, Գլխավոր Դատախազության տվյալներով՝ 2020թ. նոյեմբերի 10-ից մինչև օրս ականի վրա պայթելու հետևանքով մահացել է 27 ադրբեջանցի՝ 7 զինծառայող ու 20 քաղաքացիական անձ, վիրավորվել է 115-ը՝ 86 զինծառայող ու 29 քաղաքացիական անձ։
Էմմա Չոբանյան
