27.11.2024 | 20:30
Երկիրը նստած է «ռուսական էներգետիկ ասեղի» վրա
Ինչ հարցեր են քննարկվելու Պուտին-Բայդեն ժնևյան հանդիպմանը
Քաղաքականություն
15.06.2021 | 13:23
Ռուսաստանի և ԱՄՆ-ի հարաբերություններում իրավիճակը մոտ է կրիտիկականին, և նախագահներ Վլադիմիր Պուտինի ու Ջո Բայդենի ժնևյան հանդիպումը պետք է օգնի՝ փոխըմբռնման հասնել որոշակի հարցերում։ ՏԱՍՍ-ի փոխանցմամբ՝ նման կարծիք է հայտնել ՌԴ նախագահի օգնական Յուրի Ուշակովը։
«Հանդիպման ընթացքում, եթե ոչ պայմանավորվածություններ, ապա ըմբռնում նախագահների միջև ձեռք կբերվի։ Իհարկե, դա կազդի ռուս-ամերիկյան հարաբերությունների հետագա զարգացման վրա, որոնք հիմա փակուղում են, իրավիճակը մոտ է կրիտիկականին, և այդ համատեքստում, իհարկե, ինչ-որ բան հարկ կլինի անել»,- լրագրողների հետ զրույցում ասել է ՌԴ նախագահի օգնականը։
Նրա խոսքով՝ երկու երկրների ղեկավարները քննարկելու են և՛ Մոսկվային, և՛ Վաշինգտոնին հուզող գրեթե բոլոր հարցերը։
«Գրեթե բոլոր թեմաները, որոնք հիմա հետաքրքրում են և՛ մեզ, և՛ ամերիկյան կողմին, արտացոլված են բանակցությունների օրակարգի համաձայնեցված տարբերակում»,- ասել է Կրեմլի ներկայացուցիչը։
Քննարկման թեմաներից են ռուս-ամերիկյան հարաբերությունների իրավիճակն ու զարգացման հեռանկարները, ռազմավարական կայունության, տեղեկատվական անվտանգության, կիբերհանցագործության դեմ պայքարի հարցեր, անդրադարձ կլինի նաև կլիմային, Արկտիկային և Covid-19-ի դեմ հակազդեցությանը։
Պուտին-Բայդեն հանդիպմանը չեն շրջանցվի նաև տարածաշրջանային խնդիրները՝ Մերձավոր Արևելք, Սիրիա, Լիբիա, իրանական միջուկային ծրագրի շուրջ իրավիճակ, Աֆղանստանում, Կորեական թերակղզում, Լեռնային Ղարաբաղում իրադրություն։
«Դե՝ նաև Ուկրաինա, հնարավոր է՝ նաև այլ հարցեր։ Նախագահները կարող են ըստ հայեցողության անդրադառնալ ցանկացած թեմայի, կարող են քննարկել այնպիսի թեմաներ, որոնք նախապես չեն համաձայնեցվել և չեն ներառվել օրակարգում»,- եզրափակել է Ուշակովը։
Նշենք, որ հանդիպումից հետո երկու երկրների ղեկավարների համատեղ մամուլի ասուլիս չի նախատեսվում։
Հիշեցնենք՝ ՌԴ և ԱՄՆ նախագահներ Վլադիմիր Պուտինի և Ջո Բայդենի հանդիպումը նախանշված է հունիսի 16-ին Ժնևում։
