21.12.2025 | 22:02
Ֆուտզալի Հայաստանի հավաքականը հաղթեց Մոլդովային
Էրդողանը Բայդենի հետ հանդիպմանը Հայոց ցեղասպանության ճանաչման հարց չբարձրացրեց՝ չնայած նախօրոք արված հայտարարություններին
Քաղաքականություն
15.06.2021 | 12:38
ԱՄՆ նախագահ Ջո Բայդենն ու Թուրքիայի նախագահ Ռեջեփ Թայիփ Էրդողանը նախօրեին Բրյուսելում կայացած հանդիպմանը Հայոց ցեղասպանության ճանաչման հարց չեն քննարկել։ Այս մասին հայտարարել է Էրդողանը հանդիպմանը հաջորդած մամուլի ասուլիսի ընթացքում։
«Ահվալ» գործակալության փոխանցմամբ՝ հարցին՝ Հայոց ցեղասպանության ճանաչումը քննարկվե՞լ է Ջո Բայդենի հետ հանդիպմանը, Էրդողանը պատասխանել է․ «Փառք Աստծո, այդ հարցն օրակարգում չի եղել»։
Նշենք, որ Բրյուսել մեկնելուց առաջ Էրդողանը տարբեր հայտարարություններ էր անում՝ նշելով, որ Բայդենի՝ Հայոց ցեղասպանության ճանաչման որոշումը հնարավոր չէ չքննարկել։
«Մենք խորապես վշտացած ենք այդ հեռանկարով։ Հնարավոր չէ, որ հանդիպմանը այդ հարցը չբարձրացնենք»,- կիրակի Բելգիա մեկնելուց առաջ ասել էր Էրդողանը։
Ավելի վաղ էլ նա ևս մեկ անգամ ընդգծել էր, թե Վաշինգտոնի դիրքորոշումը Հայոց ցեղասպանության վերաբերյալ անընդունելի է։
«Մենք հոգնել ենք ամեն տարի ապրիլի 24-ին սպասել, թե Միացյալ Նահանգներում այս անգամ ի՞նչ կասեն հայերի մասին։ ԱՄՆ-ն այլ գործեր չունի՞, բացի հայերի փաստաբանի դերում հանդես գալուց։ Թող այդ հարցով զբաղվեն պատմաբանները»,-ասել էր Էրդողանը։
Նա կրկին քննադատել էր ԱՄՆ նախագահ Ջո Բայդենի՝ Հայոց ցեղասպանությունը ճանաչող վերջին հայտարարությունը։
«Նրանք, ովքեր ղեկավարել են ԱՄՆ-ն ձեզանից առաջ, այդ հարցը ձեզանից վատ չգիտեին։ Նրանցից ոչ մեկն այդ արտահայտությունը չի օգտագործել»,- ասել է Թուրքիայի նախագահը՝ նշելով, որ ՆԱՏՕ-ի երկու դաշնակիցների միջև վերջին լարվածությունն առաջացել է Սպիտակ տան ղեկավարի՝ Հայոց ցեղասպանության մասին հայտարարության պատճառով։
Հայտնի չէ, սակայն, թե ինչո՞ւ Էրդողանը, չնայած նախապես արված հայտարարություններին, ԱՄՆ նախագահի հետ հանդիպմանը չի անդրադարձել Հայոց ցեղասպանության ճանաչման հարցին։
Հիշեցնենք, որ ապրիլի 24-ի իր ուղերձում ԱՄՆ նախագահ Ջո Բայդենը ճանաչել էր Հայոց ցեղասպանությունը։
Էմմա Չոբանյան
